[1994] Paccuppannārammaṇo dhammo paccuppannārammaṇassa Dhammassa anantarapaccayena paccayo purimā purimā paccuppannārammaṇā khandhā pacchimānaṃ pacchimānaṃ paccuppannārammaṇānaṃ khandhānaṃ anantarapaccayena paccayo paccuppannārammaṇaṃ paṭisandhicittaṃ paccuppannārammaṇassa bhavaṅgassa paccuppannārammaṇaṃ bhavaṅgaṃ paccuppannārammaṇassa bhavaṅgassa anantarapaccayena paccayo.

[1995] Paccuppannārammaṇo dhammo atītārammaṇassa dhammassa anantarapaccayena paccayo paccuppannārammaṇaṃ paṭisandhicittaṃ atītārammaṇassa bhavaṅgassa paccuppannārammaṇaṃ bhavaṅgaṃ atītārammaṇassa bhavaṅgassa paccuppannārammaṇā khandhā atītārammaṇassa vuṭṭhānassa anantarapaccayena paccayo.

[1996] Atītārammaṇo dhammo atītārammaṇassa dhammassa samanantarapaccayena paccayo anantarasadisaṃ.

[1997] Atītārammaṇo dhammo atītārammaṇassa dhammassa sahajātapaccayena paccayo aññamaññapaccayena paccayo nissayapaccayena paccayo. Tayopi paccayā paṭiccavārasadisā.