[2080] Ajjhatto dhammo bahiddhā dhammassa adhipatipaccayena paccayo . ārammaṇādhipati: paro ajjhattaṃ cakkhuṃ ... vatthuṃ ... Ajjhatte khandhe garuṃ katvā assādeti abhinandati taṃ garuṃ katvā rāgo uppajjati diṭṭhi uppajjati.

[2081] Bahiddhā dhammo bahiddhā dhammassa adhipatipaccayena paccayo ārammaṇādhipati sahajātādhipati . ārammaṇādhipati: paro dānaṃ datvā sīlaṃ ... uposathakammaṃ ... taṃ garuṃ katvā ... Pubbe suciṇṇāni garuṃ katvā ... jhānā vuṭṭhahitvā ... ariyā maggā vuṭṭhahitvā maggaṃ garuṃ katvā ... phalaṃ garuṃ katvā ... Nibbānaṃ gotrabhussa vodānassa maggassa phalassa adhipatipaccayena paccayo bahiddhā cakkhuṃ ... vatthuṃ ... bahiddhā khandhe garuṃ katvā assādeti abhinandati taṃ garuṃ katvā rāgo ... diṭṭhi uppajjati. Sahajātādhipati: bahiddhādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.

[2082] Bahiddhā dhammo ajjhattassa dhammassa adhipatipaccayena paccayo . ārammaṇādhipati: ariyā nibbānaṃ garuṃ katvā paccavekkhanti nibbānaṃ gotrabhussa vodānassa maggassa phalassa adhipatipaccayena paccayo bahiddhā cakkhuṃ ... Vatthuṃ ... Bahiddhā khandhe garuṃ katvā assādeti abhinandati taṃ garuṃ katvā rāgo ... Diṭṭhi uppajjati.

[2083] Ajjhatto dhammo ajjhattassa dhammassa anantarapaccayena paccayo purimā purimā ajjhattā khandhā pacchimānaṃ pacchimānaṃ ajjhattānaṃ khandhānaṃ anantarapaccayena paccayo anulomaṃ gotrabhussa anulomaṃ vodānassa gotrabhu maggassa vodānaṃ maggassa maggo phalassa .pe. anulomaṃ phalasamāpattiyā nirodhā Vuṭṭhahantassa nevasaññānāsaññāyatanaṃ phalasamāpattiyā anantarapaccayena paccayo.