[281] Rūpī dhammo rūpissa dhammassa indriyapaccayena paccayo: Rūpajīvitindriyaṃ kaṭattārūpānaṃ indriyapaccayena paccayo . rūpī dhammo arūpissa dhammassa indriyapaccayena paccayo: cakkhundriyaṃ cakkhuviññāṇassa kāyindriyaṃ kāyaviññāṇassa indriyapaccayena paccayo . arūpī dhammo arūpissa dhammassa indriyapaccayena paccayo: tīṇi . rūpī ca arūpī ca dhammā arūpissa dhammassa indriyapaccayena paccayo: cakkhundriyañca cakkhuviññāṇañca cakkhuviññāṇasahagatānaṃ khandhānaṃ indriyapaccayena paccayo kāyindriyañca ....

[282] Arūpī dhammo arūpissa dhammassa jhānapaccayena paccayo: tīṇi . maggapaccayena paccayo: tīṇi . sampayuttapaccayena paccayo: ekaṃ.

[283] Rūpī dhammo arūpissa dhammassa vippayuttapaccayena paccayo: sahajātaṃ purejātaṃ . sahajātaṃ: paṭisandhikkhaṇe vatthu arūpīnaṃ khandhānaṃ vippayuttapaccayena paccayo . purejātaṃ: cakkhāyatanaṃ cakkhuviññāṇassa kāyāyatanaṃ kāyaviññāṇassa vatthu arūpīnaṃ khandhānaṃ vippayuttapaccayena paccayo . arūpī dhammo rūpissa dhammassa vippayuttapaccayena paccayo: sahajātaṃ pacchājātaṃ . sahajātā: arūpino khandhā cittasamuṭṭhānānaṃ rūpānaṃ vippayuttapaccayena paccayo paṭisandhikkhaṇe arūpī khandhā kaṭattārūpānaṃ vippayuttapaccayena paccayo . pacchājātā: arūpino khandhā purejātassa imassa kāyassa vippayuttapaccayena paccayo.

[284] Rūpī dhammo rūpissa dhammassa atthipaccayena paccayo: sahajātaṃ āhāraṃ indriyaṃ . sahajātaṃ: ekaṃ mahābhūtaṃ ... yāva asaññasattā kabaḷiṃkāro āhāro imassa kāyassa atthipaccayena paccayo rūpajīvitindriyaṃ kaṭattārūpānaṃ atthipaccayena paccayo . Rūpī dhammo arūpissa dhammassa atthipaccayena paccayo: sahajātaṃ purejātaṃ . sahajātaṃ: paṭisandhikkhaṇe vatthu arūpīnaṃ khandhānaṃ atthipaccayena paccayo . purejātaṃ: cakkhuṃ ... kabaḷiṃkāraṃ āhāraṃ aniccato ... Domanassaṃ uppajjati dibbena cakkhunā ... dibbāya sotadhātuyā ... Rūpāyatanaṃ cakkhuviññāṇassa phoṭṭhabbāyatanaṃ kāyaviññāṇassa cakkhāyatanaṃ cakkhuviññāṇassa kāyāyatanaṃ kāyaviññāṇassa vatthu arūpīnaṃ khandhānaṃ atthipaccayena paccayo. {284.1} Arūpī dhammo arūpissa dhammassa atthipaccayena paccayo: arūpī eko khandho tiṇṇannaṃ khandhānaṃ dve khandhā ... Paṭisandhikkhaṇe ... Arūpī dhammo rūpissa dhammassa atthipaccayena paccayo: sahajātaṃ pacchājātaṃ. Sahajātā: arūpino khandhā cittasamuṭṭhānānaṃ rūpānaṃ atthipaccayena paccayo paṭisandhikkhaṇe ... . pacchājātā: arūpino khandhā purejātassa imassa kāyassa atthipaccayena paccayo. {284.2} Arūpī dhammo rūpissa ca arūpissa ca dhammassa atthipaccayena paccayo: arūpī eko khandho tiṇṇannaṃ khandhānaṃ cittasamuṭṭhānānañca rūpānaṃ atthipaccayena paccayo dve khandhā ... paṭisandhikkhaṇe ... . rūpī ca arūpī ca dhammā rūpissa Dhammassa atthipaccayena paccayo: sahajātaṃ pacchājātaṃ āhāraṃ indriyaṃ . sahajātā: arūpino khandhā ca mahābhūtā ca cittasamuṭṭhānānaṃ rūpānaṃ atthipaccayena paccayo . pacchājātā: arūpino khandhā ca kabaḷiṃkāro āhāro ca imassa kāyassa atthipaccayena paccayo pacchājātā: arūpino khandhā ca rūpajīvitindriyañca kaṭattārūpānaṃ atthipaccayena paccayo. {284.3} Rūpī ca arūpī ca dhammā arūpissa dhammassa atthipaccayena paccayo: sahajātaṃ purejātaṃ . sahajāto: cakkhuviññāṇasahagato eko khandho ca cakkhāyatanañca tiṇṇannaṃ khandhānaṃ atthipaccayena paccayo dve khandhā ... kāyaviññāṇasahagato arūpī eko khandho ca vatthu ca tiṇṇannaṃ khandhānaṃ atthipaccayena paccayo dve khandhā ... Paṭisandhikkhaṇe arūpī eko khandho ca vatthu ca tiṇṇannaṃ khandhānaṃ dve khandhā .... Natthipaccayena paccayo: vigatapaccayena paccayo: avigatapaccayena paccayo:.