[27] Hetu dhammo hetussa dhammassa vipākapaccayena paccayo: vipāko alobho adosassa amohassa vipākapaccayena paccayo . Paṭiccavārasadisā vipākavibhaṅge nava pañhā.

[28] Nahetu dhammo nahetussa dhammassa āhārapaccayena paccayo: nahetū āhārā sampayuttakānaṃ khandhānaṃ cittasamuṭṭhānānañca rūpānaṃ āhārapaccayena paccayo paṭisandhikkhaṇe kabaḷiṃkāro āhāro imassa Kāyassa āhārapaccayena paccayo . nahetu dhammo hetussa dhammassa āhārapaccayena paccayo: nahetū āhārā sampayuttakānaṃ hetūnaṃ āhārapaccayena paccayo paṭisandhikkhaṇe .pe. nahetu dhammo hetussa ca nahetussa ca dhammassa āhārapaccayena paccayo: nahetū āhārā sampayuttakānaṃ khandhānaṃ hetūnaṃ cittasamuṭṭhānānañca rūpānaṃ āhārapaccayena paccayo paṭisandhikkhaṇe .pe.

[29] Hetu dhammo hetussa dhammassa indriyapaccayena paccayo: hetumūlake tīṇi . nahetu dhammo nahetussa dhammassa indriyapaccayena paccayo: nahetū indriyā sampayuttakānaṃ khandhānaṃ cittasamuṭṭhānānañca rūpānaṃ indriyapaccayena paccayo paṭisandhikkhaṇe rūpajīvitindriyaṃ kaṭattārūpānaṃ indriyapaccayena paccayo . evaṃ indriyapaccayo vitthāretabbo. Nava.

[30] Nahetu dhammo nahetussa dhammassa jhānapaccayena paccayo: tīṇi.