[472] Saññojanasampayutto dhammo saññojanasampayuttassa dhammassa kammapaccayena paccayo: saññojanasampayuttā cetanā saññojanasampayuttānaṃ khandhānaṃ kammapaccayena paccayo . Saññojanasampayutto dhammo saññojanavippayuttassa dhammassa kammapaccayena paccayo: sahajātā nānākhaṇikā . sahajātā: saññojanasampayuttā cetanā cittasamuṭṭhānānaṃ rūpānaṃ kammapaccayena Paccayo uddhaccasahagatā cetanā mohassa cittasamuṭṭhānānañca rūpānaṃ kammapaccayena paccayo . nānākhaṇikā: saññojanasampayuttā cetanā vipākānaṃ khandhānaṃ kaṭattā ca rūpānaṃ kammapaccayena paccayo. {472.1} Saññojanasampayutto dhammo saññojanasampayuttassa ca saññojanavippayuttassa ca dhammassa kammapaccayena paccayo: saññojanasampayuttā cetanā sampayuttakānaṃ khandhānaṃ cittasamuṭṭhānānañca rūpānaṃ kammapaccayena paccayo uddhaccasahagatā cetanā sampayuttakānaṃ khandhānaṃ mohassa ca cittasamuṭṭhānānañca rūpānaṃ kammapaccayena paccayo . saññojanavippayutto dhammo saññojanavippayuttassa dhammassa kammapaccayena paccayo: sahajātā nānākhaṇikā . Sahajātā: saññojanavippayuttā cetanā sampayuttakānaṃ khandhānaṃ cittasamuṭṭhānānañca rūpānaṃ kammapaccayena paccayo paṭisandhikkhaṇe .... Nānākhaṇikā: saññojanavippayuttā cetanā vipākānaṃ khandhānaṃ kaṭattā ca rūpānaṃ kammapaccayena paccayo.

[473] Saññojanavippayutto dhammo saññojanavippayuttassa dhammassa vipākapaccayena paccayo: ekaṃ.

[474] Saññojanasampayutto dhammo saññojanasampayuttassa dhammassa āhārapaccayena paccayo: cattāri . indriyapaccayena paccayo: cattāri . jhānapaccayena paccayo: cattāri . Maggapaccayena paccayo: cattāri. Sampayuttapaccayena paccayo: cha.

[475] Saññojanasampayutto dhammo saññojanavippayuttassa dhammassa vippayuttapaccayena paccayo: sahajātaṃ pacchājātaṃ . Saṅkhittaṃ . saññojanavippayutto dhammo saññojanavippayuttassa dhammassa vippayuttapaccayena paccayo: sahajātaṃ purejātaṃ pacchājātaṃ . Saṅkhittaṃ . saññojanavippayutto dhammo saññojanasampayuttassa dhammassa vippayuttapaccayena paccayo: purejātaṃ: vatthu saññojanasampayuttānaṃ khandhānaṃ vippayuttapaccayena paccayo . saññojanavippayutto dhammo saññojanasampayuttassa ca saññojanavippayuttassa ca dhammassa vippayuttapaccayena paccayo: purejātaṃ: vatthu uddhaccasahagatānaṃ khandhānaṃ mohassa ca vippayuttapaccayena paccayo . Saññojanasampayutto ca saññojanavippayutto ca dhammā saññojanavippayuttassa dhammassa vippayuttapaccayena paccayo: sahajātaṃ pacchājātaṃ. Saṅkhittaṃ.