[553] Ganthasampayutto dhammo ganthasampayuttassa dhammassa āsevanapaccayena paccayo: anantarasadisaṃ āvajjanāpi vuṭṭhānampi natthi.

[554] Ganthasampayutto dhammo ganthasampayuttassa dhammassa kammapaccayena paccayo: ganthasampayuttā cetanā sampayuttakānaṃ khandhānaṃ kammapaccayena paccayo . ganthasampayutto dhammo ganthavippayuttassa dhammassa kammapaccayena paccayo: sahajātā nānākhaṇikā . Sahajātā: ganthasampayuttā cetanā cittasamuṭṭhānānaṃ rūpānaṃ kammapaccayena paccayo diṭṭhigatavippayuttalobhasahagatā cetanā lobhassa ca cittasamuṭṭhānānañca rūpānaṃ kammapaccayena paccayo Domanassasahagatā cetanā paṭighassa cittasamuṭṭhānānañca rūpānaṃ kammapaccayena paccayo . nānākhaṇikā: ganthasampayuttā cetanā vipākānaṃ khandhānaṃ kaṭattā ca rūpānaṃ kammapaccayena paccayo. {554.1} Ganthasampayutto dhammo ganthasampayuttassa ca ganthavippayuttassa ca dhammassa kammapaccayena paccayo: ganthasampayuttā cetanā sampayuttakānaṃ khandhānaṃ cittasamuṭṭhānañca rūpānaṃ kammapaccayena paccayo diṭṭhigatavippayuttalobhasahagatā cetanā sampayuttakānaṃ khandhānaṃ lobhassa ca cittasamuṭṭhānānañca rūpānaṃ kammapaccayena paccayo domanassasahagatā cetanā sampayuttakānaṃ khandhānaṃ paṭighassa ca cittasamuṭṭhānānañca rūpānaṃ kammapaccayena paccayo. {554.2} Ganthavippayutto dhammo ganthavippayuttassa dhammassa kammapaccayena paccayo: sahajātā nānākhaṇikā. Sahajātā: ganthavippayuttā cetanā sampayuttakānaṃ khandhānaṃ cittasamuṭṭhānānañca rūpānaṃ kammapaccayena paccayo . nānākhaṇikā: ganthavippayuttā cetanā vipākānaṃ khandhānaṃ kaṭattā ca rūpānaṃ kammapaccayena paccayo.

[555] Ganthavippayutto dhammo ganthavippayuttassa dhammassa vipākapaccayena paccayo: ekaṃ.

[556] Ganthasampayutto dhammo ganthasampayuttassa dhammassa āhārapaccayena paccayo: cattāri . indriyapaccayena paccayo: cattāri . jhānapaccayena paccayo: cattāri . maggapaccayena Paccayo: cattāri. Sampayuttapaccayena paccayo: cha.