[80] Sahetuko dhammo sahetukassa dhammassa hetupaccayena Paccayo: sahetukā hetū sampayuttakānaṃ khandhānaṃ hetupaccayena paccayo paṭisandhikkhaṇe ... . sahetuko dhammo ahetukassa dhammassa hetupaccayena paccayo: sahetukā hetū cittasamuṭṭhānānaṃ rūpānaṃ hetupaccayena paccayo: paṭisandhikkhaṇe ... . sahetuko dhammo sahetukassa ca ahetukassa ca dhammassa hetupaccayena paccayo: sahetukā hetū sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo paṭisandhikkhaṇe .... {80.1} Ahetuko dhammo ahetukassa dhammassa hetupaccayena paccayo: vicikicchāsahagato uddhaccasahagato moho cittasamuṭṭhānānaṃ rūpānaṃ hetupaccayena paccayo . ahetuko dhammo sahetukassa dhammassa hetupaccayena paccayo: vicikicchāsahagato uddhaccasahagato moho sampayuttakānaṃ khandhānaṃ hetupaccayena paccayo . ahetuko dhammo sahetukassa ca ahetukassa ca dhammassa hetupaccayena paccayo: vicikicchāsahagato uddhaccasahagato moho sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo.

[81] Sahetuko dhammo sahetukassa dhammassa ārammaṇapaccayena paccayo: dānaṃ datvā sīlaṃ ... uposathakammaṃ ... taṃ paccavekkhati pubbe suciṇṇāni paccavekkhati jhānā vuṭṭhahitvā jhānaṃ paccavekkhati ariyā maggā vuṭṭhahitvā maggaṃ paccavekkhanti phalaṃ paccavekkhanti pahīne kilese ... vikkhambhite kilese ... Pubbe ... Sahetuke khandhe aniccato ... domanassaṃ uppajjati kusalākusale niruddhe sahetuko vipāko tadārammaṇatā uppajjati cetopariyañāṇena sahetukacittasamaṅgissa cittaṃ jānanti ākāsānañcāyatanaṃ viññāṇañcāyatanassa ākiñcaññāyatanaṃ nevasaññānāsaññāyatanassa sahetukā khandhā iddhividhañāṇassa cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa ārammaṇapaccayena paccayo sahetuke khandhe ārabbha sahetukā khandhā uppajjanti. {81.1} Sahetuko dhammo ahetukassa dhammassa ārammaṇapaccayena paccayo: sahetuke khandhe aniccato ... domanassaṃ uppajjati kusalākusale niruddhe ahetuko vipāko tadārammaṇatā uppajjati sahetuke khandhe ārabbha ahetukā khandhā ca moho ca uppajjanti. Sahetuko dhammo sahetukassa ca ahetukassa ca dhammassa ārammaṇapaccayena paccayo: sahetuke khandhe ārabbha vicikicchāsahagatā uddhaccasahagatā khandhā ca moho ca uppajjanti. {81.2} Ahetuko dhammo ahetukassa dhammassa ārammaṇapaccayena paccayo: nibbānaṃ āvajjanāya ārammaṇapaccayena paccayo: cakkhuṃ ... Vatthuṃ ... ahetuke khandhe ca mohañca aniccato ... Domanassaṃ uppajjati kusalākusale niruddhe ahetuko vipāko tadārammaṇatā uppajjati rūpāyatanaṃ cakkhuviññāṇassa phoṭṭhabbāyatanaṃ kāyaviññāṇassa ahetuke khandhe ca mohañca ārabbha ahetukā khandhā ca moho ca uppajjanti. {81.3} Ahetuko dhammo sahetukassa dhammassa ārammaṇapaccayena paccayo: ariyā nibbānaṃ paccavekkhanti nibbānaṃ gotrabhussa vodānassa maggassa phalassa ārammaṇapaccayena paccayo ariyā ahetuke pahīne kilese paccavekkhanti pubbe ... Cakkhuṃ ... Vatthuṃ ... Ahetuke khandhe ca mohaṃ ca aniccato ... domanassaṃ uppajjati kusalākusale niruddhe sahetuko vipāko tadārammaṇatā uppajjati dibbena cakkhunā rūpaṃ passanti dibbāya sotadhātuyā saddaṃ suṇanti cetopariyañāṇena ahetukacittasamaṅgissa cittaṃ jānanti ahetukā khandhā iddhividhañāṇassa cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa ārammaṇapaccayena paccayo ahetuke khandhe ca mohañca ārabbha sahetukā khandhā uppajjanti. {81.4} Ahetuko dhammo sahetukassa ca ahetukassa ca dhammassa ārammaṇapaccayena paccayo: cakkhuṃ ārabbha vicikicchāsahagatā uddhaccasahagatā khandhā ca moho ca uppajjanti sotaṃ ... Vatthuṃ ... Ahetuke khandhe ca mohañca ārabbha vicikicchāsahagatā uddhaccasahagatā khandhā ca moho ca uppajjanti . sahetuko ca ahetuko ca dhammā sahetukassa dhammassa ārammaṇapaccayena paccayo: vicikicchāsahagate uddhaccasahagate khandhe ca mohañca ārabbha sahetukā khandhā uppajjanti. {81.5} Sahetuko ca ahetuko ca dhammā ahetukassa dhammassa ārammaṇapaccayena paccayo: vicikicchāsahagate uddhaccasahagate khandhe ca mohañca ārabbha ahetukā Khandhā ca moho ca uppajjanti . sahetuko ca ahetuko ca dhammā sahetukassa ca ahetukassa ca dhammassa ārammaṇapaccayena paccayo: vicikicchāsahagate uddhaccasahagate khandhe ca mohañca ārabbha vicikicchāsahagatā uddhaccasahagatā khandhā ca moho ca uppajjanti.