[17] Hetu dhammo hetussa dhammassa hetupaccayena paccayo: alobho adosassa amohassa hetupaccayena paccayo . cakkaṃ bandhitabbaṃ . lobho mohassa hetupaccayena paccayo doso mohassa hetupaccayena paccayo paṭisandhikkhaṇe .pe. hetu dhammo nahetussa dhammassa hetupaccayena paccayo: hetu sampayuttakānaṃ khandhānaṃ cittasamuṭṭhānānañca rūpānaṃ hetupaccayena paccayo paṭisandhikkhaṇe .pe. hetu dhammo hetussa ca nahetussa ca dhammassa hetupaccayena Paccayo: alobho adosassa amohassa sampayuttakānañca khandhānaṃ cittasamuṭṭhānānañca rūpānaṃ hetupaccayena paccayo . cakkaṃ bandhitabbaṃ. Lobho mohassa .pe. Paṭisandhikkhaṇe .pe.

[18] Hetu dhammo hetussa dhammassa ārammaṇapaccayena paccayo: hetuṃ ārabbha hetū uppajjanti . hetu dhammo nahetussa dhammassa ārammaṇapaccayena paccayo: hetuṃ ārabbha nahetū khandhā uppajjanti . hetu dhammo hetussa ca nahetussa ca dhammassa ārammaṇapaccayena paccayo: hetuṃ ārabbha hetū ca sampayuttakā ca khandhā uppajjanti . nahetu dhammo nahetussa dhammassa ārammaṇapaccayena paccayo: dānaṃ datvā sīlaṃ samādiyitvā uposathakammaṃ katvā taṃ paccavekkhati pubbe suciṇṇāni paccavekkhati jhānā vuṭṭhahitvā jhānaṃ paccavekkhati ariyā maggā vuṭṭhahitvā maggaṃ paccavekkhanti phalaṃ ... nibbānaṃ ... nibbānaṃ gotrabhussa vodānassa maggassa phalassa āvajjanāya ārammaṇapaccayena paccayo ariyā nahetū pahīne kilese paccavekkhanti vikkhambhite kilese ... pubbe samudāciṇṇe kilese jānanti cakkhuṃ ... .pe. {18.1} Vatthuṃ ... nahetū khandhe aniccato dukkhato anattato vipassanti .pe. domanassaṃ uppajjati dibbena cakkhunā rūpaṃ passati dibbāya sotadhātuyā saddaṃ suṇāti cetopariyañāṇena nahetucittasamaṅgissa cittaṃ jānāti ākāsānañcāyatanakiriyaṃ viññāṇañcāyatanakiriyassa ākiñcaññāyatanakiriyaṃ Nevasaññānāsaññāyatanakiriyassa rūpāyatanaṃ cakkhuviññāṇassa .pe. phoṭṭhabbāyatanaṃ kāyaviññāṇassa ārammaṇapaccayena paccayo nahetū khandhā iddhividhañāṇassa cetopariyañāṇassa pubbenivāsānussatiñāṇassa yathākammūpagañāṇassa anāgataṃsañāṇassa āvajjanāya ārammaṇapaccayena paccayo. {18.2} Nahetu dhammo hetussa dhammassa ārammaṇapaccayena paccayo: dānaṃ datvā ... paṭhamagamanaṃyeva āvajjanā natthi rūpāyatanaṃ cakkhuviññāṇassa .pe. phoṭṭhabbāyatanaṃ kāyaviññāṇassāti idaṃ natthi . nahetu dhammo hetussa ca nahetussa ca dhammassa ārammaṇapaccayena paccayo: dānaṃ datvā sīlaṃ ... uposathakammaṃ ... Taṃ paccavekkhati taṃ ārabbha hetū ca sampayuttakā ca khandhā uppajjanti. Tattha ṭhitena imaṃ kātabbaṃ dutiyagamanasadisaṃ. {18.3} Hetu ca nahetu ca dhammā hetussa dhammassa ārammaṇapaccayena paccayo: hetuñca sampayuttake ca khandhe ārabbha hetū uppajjanti. Hetu ca nahetu ca dhammā nahetussa dhammassa ārammaṇapaccayena paccayo: hetuñca sampayuttake ca khandhe ārabbha nahetū khandhā uppajjanti . hetu ca nahetu ca dhammā hetussa ca nahetussa ca dhammassa ārammaṇapaccayena paccayo: hetuñca sampayuttake ca khandhe ārabbha hetū ca sampayuttakā ca khandhā uppajjanti.