[208] Sanidassano dhammo anidassanassa dhammassa purejātapaccayena paccayo: sanidassanaṃ rūpaṃ aniccato ... domanassaṃ uppajjati dibbena cakkhunā rūpaṃ passati rūpāyatanaṃ cakkhuviññāṇassa purejātapaccayena paccayo . anidassano dhammo anidassanassa dhammassa purejātapaccayena paccayo: ārammaṇapurejātaṃ vatthupurejātaṃ . ārammaṇapurejātaṃ: cakkhuṃ ... vatthuṃ aniccato ... Domanassaṃ uppajjati dibbāya sotadhātuyā saddaṃ suṇāti saddāyatanaṃ sotaviññāṇassa phoṭṭhabbāyatanaṃ kāyaviññāṇassa purejātapaccayena paccayo . vatthupurejātaṃ: cakkhāyatanaṃ cakkhuviññāṇassa kāyāyatanaṃ kāyaviññāṇassa vatthu anidassanānaṃ khandhānaṃ purejātapaccayena paccayo . sanidassano ca anidassano ca dhammā anidassanassa dhammassa purejātapaccayena paccayo: ārammaṇapurejātaṃ: vatthupurejātaṃ: rūpāyatanañca vatthu ca anidassanānaṃ khandhānaṃ purejātapaccayena paccayo rūpāyatanañca cakkhāyatanañca cakkhuviññāṇassa purejātapaccayena paccayo.

[209] Anidassano dhammo anidassanassa dhammassa pacchājātapaccayena paccayo: pacchājātā anidassanā khandhā purejātassa imassa anidassanassa kāyassa pacchājātapaccayena paccayo . anidassano dhammo sanidassanassa dhammassa pacchājātapaccayena paccayo: pacchājātā anidassanā khandhā purejātassa imassa sanidassanassa kāyassa pacchājātapaccayena paccayo . anidassano dhammo sanidassanassa ca anidassanassa ca dhammassa pacchājātapaccayena paccayo: pacchājātā anidassanā khandhā purejātassa imassa sanidassanassa ca anidassanassa ca kāyassa pacchājātapaccayena paccayo.

[210] Anidassano dhammo anidassanassa dhammassa āsevanapaccayena paccayo: purimā ....

[211] Anidassano dhammo anidassanassa dhammassa kammapaccayena paccayo: sahajātā nānākhaṇikā . sahajātā: anidassanā cetanā sampayuttakānaṃ khandhānaṃ anidassanānañca cittasamuṭṭhānānaṃ rūpānaṃ kammapaccayena paccayo . nānākhaṇikā: anidassanā cetanā vipākānaṃ anidassanānaṃ khandhānaṃ anidassanānañca kaṭattārūpānaṃ kammapaccayena paccayo . anidassano dhammo sanidassanassa dhammassa kammapaccayena paccayo: sahajātā nānākhaṇikā . vitthāretabbaṃ . anidassano dhammo sanidassanassa ca anidassanassa ca dhammassa kammapaccayena paccayo: sahajātā nānākhaṇikā. Vitthāretabbaṃ.