[1377] Nīvaraṇavippayuttaṃ nīvaraṇiyaṃ kusalaṃ dhammaṃ paṭicca nīvaraṇavippayutto nīvaraṇiyo kusalo dhammo uppajjati hetupaccayā: . Nīvaraṇavippayuttaṃ anīvaraṇiyaṃ kusalaṃ dhammaṃ paṭicca nīvaraṇavippayutto anīvaraṇiyo kusalo dhammo uppajjati hetupaccayā:.

[1378] Hetuyā dve ārammaṇe dve avigate dve. Sahajātavāropi pañhāvāropi vitthāretabbā. ---------- Paṭiccavāro

[1379] Nīvaraṇavippayuttaṃ nīvaraṇiyaṃ abyākataṃ dhammaṃ paṭicca nīvaraṇavippayutto nīvaraṇiyo abyākato dhammo uppajjati hetupaccayā:. Nīvaraṇavippayuttaṃ anīvaraṇiyaṃ abyākataṃ dhammaṃ paṭicca nīvaraṇavippayutto anīvaraṇiyo abyākato dhammo uppajjati hetupaccayā: tīṇi . nīvaraṇavippayuttaṃ nīvaraṇiyaṃ abyākatañca nīvaraṇavippayuttaṃ anīvaraṇiyaṃ abyākatañca dhammaṃ paṭicca nīvaraṇavippayutto nīvaraṇiyo abyākato dhammo uppajjati hetupaccayā:.

[1380] Hetuyā pañca ārammaṇe dve vipāke pañca. Sahajātavārepi pañhāvārepi sabbattha vitthāretabbaṃ. Nīvaraṇavippayuttanīvaraṇiyadukakusalattikaṃ niṭṭhitaṃ. Nīvaraṇagocchakadukakusalattikaṃ niṭṭhitaṃ. -----------