[104] Hetupaccayā naārammaṇe tīṇi.

[105] Nahetupaccayā ārammaṇe nava. Yathā kusalattike pañhāvārassa anulomampi paccanīyampi anulomapaccanīyampi paccanīyānulomampi gaṇitaṃ evaṃ gaṇetabbaṃ. ------- Paṭiccavāro

[106] Hetuṃ adukkhamasukhāyavedanāyasampayuttaṃ dhammaṃ paṭicca hetu adukkhamasukhāyavedanāyasampayutto dhammo uppajjati hetupaccayā: tīṇi . nahetuṃ adukkhamasukhāyavedanāyasampayuttaṃ dhammaṃ paṭicca nahetu adukkhamasukhāyavedanāyasampayutto dhammo uppajjati hetupaccayā: tīṇi . hetuṃ adukkhamasukhāyavedanāyasampayuttañca nahetuṃ adukkhamasukhāya- vedanāyasampayuttañca dhammaṃ paṭicca hetu adukkhamasukhāyavedanāyasampayutto dhammo uppajjati hetupaccayā: tīṇi.

[107] Hetuyā nava ārammaṇe nava adhipatiyā nava anantare nava samanantare nava sahajāte nava aññamaññe nava nissaye nava upanissaye nava purejāte nava āsevane nava kamme nava vipāke nava āhāre nava indriye nava jhāne nava magge nava sampayutte nava vippayutte nava atthiyā nava natthiyā nava vigate nava avigate nava.