[148] Tena kho pana samayena chabbaggiyā bhikkhū acchinnakāni cīvarāni dhārenti dantakasāvāni dhārenti. Manussā ujjhāyanti khīyanti vipācenti . bhikkhū bhagavato etamatthaṃ ārocesuṃ. Na bhikkhave acchinnakāni cīvarāni dhāretabbāni yo dhāreyya āpatti dukkaṭassāti.

[149] Athakho bhagavā rājagahe yathābhirantaṃ viharitvā yena dakkhiṇāgiri tena cārikaṃ pakkāmi . addasā kho bhagavā māgadhakkhettaṃ accibaddhaṃ pālibaddhaṃ mariyādabaddhaṃ siṅghāṭakabaddhaṃ disvāna āyasmantaṃ ānandaṃ āmantesi passasi no tvaṃ ānanda māgadhakkhettaṃ accibaddhaṃ pālibaddhaṃ mariyādabaddhaṃ siṅghāṭakabaddhanti . evaṃ bhanteti . Ussahasi tvaṃ ānanda bhikkhūnaṃ evarūpāni cīvarāni saṃvidahitunti . Ussahāmi bhagavāti . athakho bhagavā dakkhiṇāgirismiṃ yathābhirantaṃ viharitvā punadeva rājagahaṃ pacchāgacchi. {149.1} Athakho āyasmā ānando sambahulānaṃ bhikkhūnaṃ cīvarāni saṃvidahitvā yena bhagavā tenupasaṅkami upasaṅkamitvā bhagavantaṃ etadavoca passatu me bhante bhagavā cīvarāni saṃvidahitānīti . athakho bhagavā etasmiṃ nidāne etasmiṃ Po. Ma. acchibandhaṃ. Pakaraṇe dhammiṃ kathaṃ katvā bhikkhū āmantesi paṇḍito bhikkhave ānando mahāpañño bhikkhave ānando yatra hi nāma mayā saṅkhittena bhāsitassa vitthārena atthaṃ ājānissati kusimpi nāma karissati aḍḍhakusimpi nāma karissati maṇḍalampi nāma karissati aḍḍhamaṇḍalampi nāma karissati vivaṭṭampi nāma karissati anuvivaṭṭampi nāma karissati gīveyyakampi nāma karissati jaṅgheyyakampi nāma karissati bāhantampi nāma karissati chinnakañca bhavissati satthalūkhaṃ samaṇasāruppaṃ paccatthikānañca anabhijjhitaṃ anujānāmi bhikkhave chinnakaṃ saṅghāṭiṃ chinnakaṃ uttarāsaṅgaṃ chinnakaṃ antaravāsakanti.