[218] Idha pana bhikkhave bhikkhu bhaṇḍanakārako hoti kalahakārako vivādakārako bhassakārako saṅghe adhikaraṇakārako . tatra ce bhikkhūnaṃ evaṃ hoti ayaṃ kho āvuso bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako handassa mayaṃ tajjanīyakammaṃ karomāti . te tassa tajjanīyakammaṃ karonti adhammena vaggā . tatraṭṭho saṅgho vivadati adhammena vaggakammaṃ adhammena samaggakammaṃ [1]- dhammapaṭirūpakena vaggakammaṃ dhammapaṭirūpakena samaggakammaṃ akataṃ kammaṃ dukkaṭaṃ kammaṃ puna kātabbaṃ kammanti . tatra bhikkhave ye te bhikkhū evamāhaṃsu Adhammena vaggakammanti ye ca te bhikkhū evamāhaṃsu akataṃ kammaṃ dukkaṭaṃ kammaṃ puna kātabbaṃ kammanti . ime tattha bhikkhū dhammavādino.

[219] Idha pana bhikkhave bhikkhu bhaṇḍanakārako hoti kalahakārako vivādakārako bhassakārako saṅghe adhikaraṇakārako . tatra ce bhikkhūnaṃ evaṃ hoti ayaṃ kho āvuso bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako handassa mayaṃ tajjanīyakammaṃ karomāti . te tassa tajjanīyakammaṃ karonti adhammena samaggā . tatraṭṭho saṅgho vivadati adhammena vaggakammaṃ adhammena samaggakammaṃ dhammena vaggakammaṃ dhammapaṭirūpakena vaggakammaṃ dhammapaṭirūpakena samaggakammaṃ akataṃ kammaṃ dukkaṭaṃ kammaṃ puna kātabbaṃ kammanti . tatra bhikkhave ye te bhikkhū evamāhaṃsu adhammena samaggakammanti ye ca te bhikkhū evamāhaṃsu akataṃ kammaṃ dukkaṭaṃ kammaṃ puna kātabbaṃ kammanti. Ime tattha bhikkhū dhammavādino.

[220] Idha pana bhikkhave bhikkhu bhaṇḍanakārako hoti kalahakārako vivādakārako bhassakārako saṅghe adhikaraṇakārako . tatra ce bhikkhūnaṃ evaṃ hoti ayaṃ kho āvuso bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako handassa mayaṃ tajjanīyakammaṃ karomāti . te tassa tajjanīyakammaṃ Karonti dhammena vaggā . tatraṭṭho saṅgho vivadati adhammena vaggakammaṃ dhammena samaggakammaṃ dhammena vaggakammaṃ dhammapaṭirūpakena vaggakammaṃ dhammapaṭirūpakena samaggakammaṃ akataṃ kammaṃ dukkaṭaṃ kammaṃ puna kātabbaṃ kammanti . tatra bhikkhave ye te bhikkhū evamāhaṃsu dhammena vaggakammanti ye ca te bhikkhū evamāhaṃsu akataṃ kammaṃ dukkaṭaṃ kammaṃ puna kātabbaṃ kammanti . ime tattha bhikkhū dhammavādino.