[179] Adhammena ce bhikkhave vaggakammaṃ akammaṃ na ca Karaṇīyaṃ . adhammena ce bhikkhave samaggakammaṃ akammaṃ na ca karaṇīyaṃ. Dhammena ce bhikkhave vaggakammaṃ akammaṃ na ca karaṇīyaṃ. Dhammapaṭirūpakena ce bhikkhave vaggakammaṃ akammaṃ na ca karaṇīyaṃ . dhammapaṭirūpakena ce bhikkhave samaggakammaṃ akammaṃ na ca karaṇīyaṃ . ñattivipannañce bhikkhave kammaṃ anusāvanasampannaṃ akammaṃ na ca karaṇīyaṃ . Anusāvanavipannañce bhikkhave kammaṃ ñattisampannaṃ akammaṃ na ca karaṇīyaṃ . ñattivipannañce bhikkhave kammaṃ anussāvanavipannaṃ akammaṃ na ca karaṇīyaṃ . aññatrāpi bhikkhave dhammā kammaṃ akammaṃ na ca karaṇīyaṃ . aññatrāpi bhikkhave vinayā kammaṃ akammaṃ na ca karaṇīyaṃ . aññatrāpi bhikkhave satthu sāsanā kammaṃ akammaṃ na ca karaṇīyaṃ . paṭikuṭṭhakataṃ ce bhikkhave kammaṃ adhammikaṃ kuppaṃ aṭṭhānārahaṃ akammaṃ na ca karaṇīyaṃ.

[180] Chayimāni bhikkhave kammāni adhammakammaṃ vaggakammaṃ samaggakammaṃ dhammapaṭirūpakena vaggakammaṃ dhammapaṭirūpakena samaggakammaṃ dhammena samaggakammaṃ.

[181] Katamañca bhikkhave adhammakammaṃ . ñattidutiye ce bhikkhave kamme ekāya ñattiyā kammaṃ karoti na ca kammavācaṃ anussāveti adhammakammaṃ . ñattidutiye ce bhikkhave kamme dvīhi ñattīhi kammaṃ karoti na ca kammavācaṃ anussāveti adhammakammaṃ . ñattidutiye ce bhikkhave kamme ekāya kammavācāya kammaṃ karoti na ca ñattiṃ Ṭhapeti adhammakammaṃ . ñattidutiye ce bhikkhave kamme dvīhi kammavācāhi kammaṃ karoti na ca ñattiṃ ṭhapeti adhammakammaṃ . Ñatticatutthe ce bhikkhave kamme ekāya ñattiyā kammaṃ karoti na ca kammavācaṃ anussāveti adhammakammaṃ . ñatticatutthe ce bhikkhave kamme dvīhi ñattīhi tīhi ñattīhi catūhi ñattīhi kammaṃ karoti na ca kammavācaṃ anussāveti adhammakammaṃ . ñatticatutthe ce bhikkhave kamme ekāya kammavācāya kammaṃ karoti na ca ñattiṃ ṭhapeti adhammakammaṃ . ñatticatutthe ce bhikkhave kamme dvīhi kammavācāhi tīhi kammavācāhi catūhi kammavācāhi kammaṃ karoti na ca ñattiṃ ṭhapeti adhammakammaṃ . idaṃ vuccati bhikkhave adhammakammaṃ.