[185] Katamañca bhikkhave dhammapaṭirūpakena samaggakammaṃ . Ñattidutiye ce bhikkhave kamme paṭhamaṃ kammavācaṃ anussāveti pacchā Ñattiṃ ṭhapeti yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā nappaṭikkosanti dhammapaṭirūpakena samaggakammaṃ . ñatticatutthe ce bhikkhave kamme paṭhamaṃ kammavācaṃ anussāveti pacchā ñattiṃ ṭhapeti yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā nappaṭikkosanti dhammapaṭirūpakena samaggakammaṃ. Idaṃ vuccati bhikkhave dhammapaṭirūpakena samaggakammaṃ.

[186] Katamañca bhikkhave dhammena samaggakammaṃ . ñattidutiye ce bhikkhave kamme paṭhamaṃ ñattiṃ ṭhapeti pacchā ekāya kammavācāya kammaṃ karoti yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā nappaṭikkosanti dhammena samaggakammaṃ . ñatticatutthe ce bhikkhave kamme paṭhamaṃ ñattiṃ ṭhapeti pacchā tīhi kammavācāhi kammaṃ karoti yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā nappaṭikkosanti . dhammena samaggakammaṃ. Idaṃ vuccati bhikkhave dhammena samaggakammaṃ.