[195] Dvemā bhikkhave osāraṇā atthi bhikkhave puggalo appatto osāraṇaṃ taṃ ce saṅgho osāreti ekacco sosārito ekacco dosārito . katamo ca bhikkhave puggalo appatto osāraṇaṃ taṃ ce saṅgho osāreti dosārito . paṇḍako bhikkhave appatto osāraṇaṃ tañce saṅgho osāreti dosārito . Theyyasaṃvāsako bhikkhave .pe. titthiyapakkantako bhikkhave tiracchānagato bhikkhave mātughātako bhikkhave pitughātako bhikkhave arahantaghātako bhikkhave bhikkhunīdūsako bhikkhave saṅghabhedako bhikkhave lohituppādako bhikkhave ubhatobyañjanako bhikkhave appatto osāraṇaṃ taṃ ce saṅgho osāreti dosārito . Ayaṃ vuccati bhikkhave puggalo appatto osāraṇaṃ taṃ ce saṅgho osāreti dosārito . katamo ca bhikkhave puggalo appatto osāraṇaṃ taṃ ce saṅgho osāreti sosārito [1]- . Hatthacchinno bhikkhave appatto osāraṇaṃ taṃ ce saṅgho osāreti sosārito . Pādacchinno bhikkhave .pe. hatthapādacchinno bhikkhave Kaṇṇacchinno bhikkhave nāsacchinno bhikkhave kaṇṇanāsacchinno bhikkhave aṅgulicchinno bhikkhave aḷacchinno bhikkhave kaṇḍaracchinno bhikkhave phaṇahatthako bhikkhave khujjo bhikkhave vāmano bhikkhave galagaṇḍī bhikkhave lakkhaṇāhato bhikkhave kasāhato bhikkhave likhitako bhikkhave sīpadī bhikkhave pāparogī bhikkhave parisadūsako bhikkhave kāṇo bhikkhave kuṇī bhikkhave khañjo bhikkhave pakkhahato bhikkhave chinniriyapatho bhikkhave jarādubbalo bhikkhave andho bhikkhave mūgo bhikkhave badhiro bhikkhave andhamūgo bhikkhave andhabadhiro bhikkhave mūgabadhiro bhikkhave andhamūgabadhiro bhikkhave appatto osāraṇaṃ taṃ ce saṅgho osāreti sosārito . ayaṃ vuccati bhikkhave puggalo appatto osāraṇaṃ taṃ ce saṅgho osāreti sosārito [2]-. Vāsabhagāmabhāṇavāraṃ paṭhamaṃ .