[81] Tena kho pana samayena vesālī subhikkhā hoti susassā sulabhapiṇḍā sukarā uñchena paggahena yāpetuṃ . athakho bhagavato rahogatassa paṭisallīnassa evaṃ cetaso parivitakko udapādi yāni tāni mayā bhikkhūnaṃ anuññātāni dubbhikkhe dussasse dullabhapiṇḍe antovutthaṃ antopakkaṃ sāmaṃpakkaṃ uggahitapaṭiggahitakaṃ tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ ajjāpi nu kho tāni bhikkhū paribhuñjantīti. {81.1} Athakho bhagavā sāyaṇhasamayaṃ paṭisallānā vuṭṭhito āyasmantaṃ ānandaṃ āmantesi yāni tāni ānanda mayā bhikkhūnaṃ anuññātāni dubbhikkhe dussasse dullabhapiṇḍe antovutthaṃ antopakkaṃ sāmaṃpakkaṃ uggahitapaṭiggahitakaṃ tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ ajjāpi nu kho tāni bhikkhū paribhuñjantīti. Paribhuñjanti bhagavāti. {81.2} Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi yāni tāni bhikkhave mayā bhikkhūnaṃ anuññātāni dubbhikkhe dussasse dullabhapiṇḍe antovutthaṃ antopakkaṃ sāmaṃpakkaṃ uggahitapaṭiggahitakaṃ tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ tānāhaṃ ajjatagge paṭikkhipāmi na bhikkhave antovutthaṃ antopakkaṃ sāmaṃpakkaṃ Uggahitapaṭiggahitakaṃ paribhuñjitabbaṃ yo paribhuñjeyya āpatti dukkaṭassa . na ca bhikkhave tato nīhaṭaṃ purebhattaṃ paṭiggahitaṃ vanaṭṭhaṃ pokkharaṭṭhaṃ bhuttāvinā pavāritena anatirittaṃ paribhuñjitabbaṃ yo paribhuñjeyya yathādhammo kāretabbo.