[117] Aparesampi bhikkhave tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya eko kāyikena upaghātikena samannāgato hoti eko vācasikena upaghātikena samannāgato hoti eko kāyikavācasikena upaghātikena samannāgato hoti imesaṃ kho bhikkhave tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya.

[118] Aparesampi bhikkhave tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya eko kāyikena micchājīvena samannāgato hoti eko vācasikena micchājīvena samannāgato hoti eko kāyikavācasikena micchājīvena samannāgato hoti imesaṃ kho bhikkhave tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya. Ākaṅkhamānacuddasakaṃ niṭṭhitaṃ.

[119] Pabbājanīyakammakatena bhikkhave bhikkhunā sammā vattitabbaṃ. Tatrāyaṃ sammāvattanā na upasampādetabbaṃ na nissayo dātabbo na sāmaṇero upaṭṭhāpetabbo na bhikkhunovādakasammati sāditabbā sammatenapi bhikkhuniyo na ovaditabbā yāya āpattiyā saṅghena pabbājanīyakammaṃ kataṃ hoti sā āpatti na āpajjitabbā aññā vā tādisikā tato vā pāpiṭṭhatarā kammaṃ na garahitabbaṃ kammikā na garahitabbā na pakatattassa bhikkhuno uposatho ṭhapetabbo na pavāraṇā ṭhapetabbā na savacanīyaṃ kātabbaṃ na anuvādo paṭṭhapetabbo na okāso kāretabbo na codetabbo na sāretabbo na bhikkhū bhikkhūhi sampayojetabbanti. Pabbājanīyakamme aṭṭhārasavattaṃ niṭṭhitaṃ.

[120] Athakho sārīputtamoggallānappamukho bhikkhusaṅgho kiṭāgiriṃ gantvā assajipunabbasukānaṃ bhikkhūnaṃ kiṭāgirismā pabbājanīyakammaṃ akāsi nāssajipunabbasukehi bhikkhūhi kiṭāgirismiṃ vatthabbanti . Te saṅghena pabbājanīyakammakatā na sammā vattanti na lomaṃ pātenti na netthāraṃ vattanti bhikkhū na khamāpenti akkosanti paribhāsanti chandagāmitā dosagāmitā mohagāmitā bhayagāmitā pāpenti pakkamantipi vibbhamantipi ye te bhikkhū appicchā .pe. te ujjhāyanti khīyanti vipācenti kathaṃ hi nāma assajipunabbasukā bhikkhū saṅghena pabbājanīyakammakatā na sammā vattissanti na lomaṃ pātessanti Na netthāraṃ vattissanti bhikkhū na khamāpessanti akkosissanti paribhāsissanti chandagāmitā dosagāmitā mohagāmitā bhayagāmitā pāpessanti pakkamissantipi vibbhamissantipīti . athakho te bhikkhū bhagavato etamatthaṃ ārocesuṃ.