[538] Tena kho pana samayena āyasmā udāyi ovādaṃ ṭhapetvā Cārikaṃ pakkāmi . bhikkhuniyo ujjhāyanti khīyanti vipācenti kathaṃ hi nāma ayyo udāyi ovādaṃ ṭhapetvā cārikaṃ pakkamissatīti .pe. Bhagavato etamatthaṃ ārocesuṃ .pe. na bhikkhave ovādaṃ ṭhapetvā cārikaṃ pakkamitabbaṃ yo pakkameyya āpatti dukkaṭassāti.

[539] Tena kho pana samayena bhikkhū bālā abyattā ovādaṃ ṭhapenti .pe. bhagavato etamatthaṃ ārocesuṃ .pe. na bhikkhave bālena abyattena ovādo ṭhapetabbo yo ṭhapeyya āpatti dukkaṭassāti.

[540] Tena kho pana samayena bhikkhū avatthusmiṃ akāraṇe ovādaṃ ṭhapenti .pe. bhagavato etamatthaṃ ārocesuṃ .pe. Na bhikkhave avatthusmiṃ akāraṇe ovādo ṭhapetabbo yo ṭhapeyya āpatti dukkaṭassāti.

[541] Tena kho pana samayena bhikkhū ovādaṃ ṭhapetvā vinicchayaṃ na denti . bhagavato etamatthaṃ ārocesuṃ . na bhikkhave ovādaṃ ṭhapetvā vinicchayo na dātabbo yo na dadeyya āpatti dukkaṭassāti.