[573] Tena kho pana samayena upasampannāyo dissanti animittāpi nimittamattāpi alohitāpi dhuvalohitāpi dhuvacoḷāpi paggharantīpi sikhariṇīpi itthīpaṇḍakāpi vepurisikāpi sambhinnāpi ubhatobyañjanakāpi .pe. bhagavato etamatthaṃ ārocesuṃ . anujānāmi bhikkhave upasampādentiyā catuvīsati antarāyike dhamme pucchituṃ . evañca Pana bhikkhave pucchitabbā nasi animittā nasi nimittamattā nasi alohitā nasi dhuvalohitā nasi dhuvacoḷā nasi paggharantī nasi sikhariṇī nasi itthīpaṇḍakā nasi vepurisikā nasi sambhinnā nasi ubhatobyañjanakā santi te evarūpā ābādhā kuṭṭhaṃ gaṇḍo kilāso soso apamāro manussāsi itthīsi bhujissāsi anaṇāsi nasi rājabhaṭī anuññātāsi mātāpitūhi sāmikena paripuṇṇavīsati- vassāsi paripuṇṇante pattacīvaraṃ kinnāmāsi kānāmā te pavattinīti.

[574] Tena kho pana samayena bhikkhū bhikkhunīnaṃ antarāyike dhamme pucchanti . upasampadāpekkhāyo vitthāyanti maṅkū honti na sakkonti vissajjetuṃ . bhagavato etamatthaṃ ārocesuṃ . Anujānāmi bhikkhave ekatoupasampannāya bhikkhunīsaṅghe visuddhāya bhikkhusaṅghe upasampādetunti .

[575] Tena kho pana samayena bhikkhuniyo ananusiṭṭhāyo upasampadāpekkhāyo antarāyike dhamme pucchanti . Upasampadāpekkhāyo vitthāyanti maṅkū honti na sakkonti vissajjetuṃ . bhagavato etamatthaṃ ārocesuṃ . anujānāmi bhikkhave paṭhamaṃ anusāsitvā pacchā antarāyike dhamme pucchitunti . tattheva saṅghamajjhe anusāsanti . upasampadāpekkhāyo tatheva vitthāyanti maṅkū Honti na sakkonti vissajjetuṃ . bhagavato etamatthaṃ ārocesuṃ . Anujānāmi bhikkhave ekamantaṃ anusāsitvā saṅghamajjhe antarāyike dhamme pucchituṃ . evañca pana bhikkhave anusāsitabbā . paṭhamaṃ upajjhaṃ gāhāpetabbā upajjhaṃ gāhāpetvā pattacīvaraṃ ācikkhitabbaṃ ayante patto ayaṃ saṅghāṭi ayaṃ uttarāsaṅgo ayaṃ antaravāsako idaṃ saṅkacchikaṃ ayaṃ udakasāṭikā gaccha amumhi okāse tiṭṭhāhīti . Bālā abyattā anusāsanti . duranusiṭṭhā upasampadāpekkhāyo vitthāyanti maṅkū honti na sakkonti vissajjetuṃ . bhagavato etamatthaṃ ārocesuṃ. {575.1} Na bhikkhave bālāya abyattāya anusāsitabbā yā anusāseyya āpatti dukkaṭassa anujānāmi bhikkhave byattāya bhikkhuniyā paṭibalāya anusāsitunti . asammatā anusāsanti . Bhagavato etamatthaṃ ārocesuṃ . na bhikkhave asammatāya anusāsitabbā yā anusāseyya āpatti dukkaṭassa anujānāmi bhikkhave sammatāya anusāsituṃ . evañca pana bhikkhave sammannitabbā . attanā va attānaṃ sammannitabbaṃ parāya vā parā sammannitabbā.