[590] Tena kho pana samayena bhikkhuniyo bhikkhūnaṃ uposathaṃ ṭhapenti pavāraṇaṃ ṭhapenti savacanīyaṃ karonti anuvādaṃ paṭṭhapenti okāsaṃ kārenti codenti sārenti .pe. bhagavato etamatthaṃ ārocesuṃ .pe. na bhikkhave bhikkhuniyā bhikkhussa uposatho ṭhapetabbo ṭhapitopi aṭṭhapito ṭhapentiyā āpatti dukkaṭassa na pavāraṇā ṭhapetabbā ṭhapitāpi aṭṭhapitā ṭhapentiyā āpatti dukkaṭassa na savacanīyaṃ kātabbaṃ katampi akataṃ karontiyā āpatti dukkaṭassa na anuvādo paṭṭhapetabbo paṭṭhapitopi appaṭṭhapito paṭṭhapentiyā āpatti dukkaṭassa na okāso kāretabbo kāritopi akārito kārentiyā āpatti dukkaṭassa na codetabbo coditopi acodito codentiyā āpatti Dukkaṭassa na sāretabbo sāritopi assārito sārentiyā āpatti dukkaṭassāti.

[591] Tena kho pana samayena bhikkhū bhikkhunīnaṃ uposathaṃ ṭhapenti pavāraṇaṃ ṭhapenti savacanīyaṃ karonti anuvādaṃ paṭṭhapenti okāsaṃ kārenti codenti sārenti . Bhagavato etamatthaṃ ārocesuṃ. Anujānāmi bhikkhave bhikkhunā bhikkhuniyā uposathaṃ ṭhapetuṃ ṭhapitopi suṭṭhapito ṭhapentassa anāpatti pavāraṇaṃ ṭhapetuṃ ṭhapitāpi suṭṭhapitā ṭhapentassa anāpatti savacanīyaṃ kātuṃ kataṃpi sukataṃ karontassa anāpatti anuvādaṃ paṭṭhapetuṃ paṭṭhapitopi suppaṭṭhapito paṭṭhapentassa anāpatti okāsaṃ kāretuṃ kāritopi sukārito kārentassa anāpatti codetuṃ coditāpi sucoditā codentassa anāpatti sāretuṃ sāritāpi sussāritā sārentassa anāpattīti.