[592] Tena kho pana samayena chabbaggiyā bhikkhuniyo yānena yāyanti itthīyuttenapi purisantarena purisayuttenapi itthantarena . Manussā ujjhāyanti khīyanti vipācenti .pe. Seyyathāpi gaṅgāmahikāyāti. Bhagavato etamatthaṃ ārocesuṃ . na bhikkhave bhikkhuniyā yānena yāyitabbaṃ yā yāyeyya yathādhammo kāretabboti.

[593] Tena kho pana samayena aññatarā bhikkhunī gilānā hoti na sakkoti padasā gantuṃ . bhagavato etamatthaṃ ārocesuṃ . Anujānāmi bhikkhave bhikkhuniyā gilānāya yānena yāyitunti . Athakho bhikkhunīnaṃ etadahosi itthīyuttaṃ nu kho purisayuttaṃ nu khoti . Bhagavato etamatthaṃ ārocesuṃ . anujānāmi bhikkhave itthīyuttaṃ purisayuttaṃ hatthavaṭṭakanti.

[594] Tena kho pana samayena aññatarissā bhikkhuniyā yānugghātena bāḷhataraṃ aphāsukaṃ ahosi . bhagavato etamatthaṃ ārocesuṃ. Anujānāmi bhikkhave sivikaṃ pāṭaṅkinti.