[72] Tena kho pana samayena antarāmagge udakaṃ akappiyaṃ hoti . parissāvanaṃ na hoti . bhagavato etamatthaṃ ārocesuṃ . Anujānāmi bhikkhave parissāvananti . coḷakaṃ nappahoti .pe. Anujānāmi bhikkhave kaṭacchuparissāvananti . coḷakaṃ nappahoti . Bhagavato etamatthaṃ ārocesuṃ. Anujānāmi bhikkhave dhammakarakanti.

[73] Tena kho pana samayena dve bhikkhū kosalesu janapadesu addhānamaggapaṭipannā honti . eko bhikkhu anācāraṃ ācarati . Dutiyo bhikkhu taṃ bhikkhuṃ etadavoca mā āvuso evarūpamakāsi netaṃ kappatīti . so tasmiṃ upanaddhi . athakho so bhikkhu pipāsāya pīḷito upanaddhaṃ bhikkhuṃ etadavoca dehi me āvuso parissāvanaṃ pānīyaṃ pivissāmīti . upanaddho bhikkhu na adāsi . So bhikkhu pipāsāya pīḷito kālamakāsi . athakho so bhikkhu ārāmaṃ gantvā bhikkhūnaṃ etamatthaṃ ārocesi . kiṃ pana tvaṃ āvuso parissāvanaṃ yāciyamāno na adāsīti . evamāvusoti . Ye te bhikkhū appicchā .pe. te ujjhāyanti khīyanti vipācenti kathaṃ hi nāma bhikkhu parissāvanaṃ yāciyamāno na dassatīti . athakho te bhikkhū bhagavato etamatthaṃ ārocesuṃ.

[74] Athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā taṃ bhikkhuṃ paṭipucchi saccaṃ kira tvaṃ bhikkhu parissāvanaṃ yāciyamāno na adāsīti . saccaṃ bhagavāti . vigarahi buddho bhagavā ananucchavikaṃ te moghapurisa ananulomikaṃ appaṭirūpaṃ Assāmaṇakaṃ akappiyaṃ akaraṇīyaṃ kathaṃ hi nāma tvaṃ moghapurisa parissāvanaṃ yāciyamāno na dassasi netaṃ moghapurisa appasannānaṃ vā pasādāya .pe. vigarahitvā dhammiṃ kathaṃ katvā bhikkhū āmantesi na bhikkhave addhāna- maggapaṭipannena bhikkhunā parissāvanaṃ yāciyamānena na dātabbaṃ yo na dadeyya āpatti dukkaṭassa na ca bhikkhave aparissāvanakena addhānamaggo paṭipajjitabbo yo paṭipajjeyya āpatti dukkaṭassa sace na hoti parissāvanaṃ vā dhammakarako vā saṅghāṭikaṇṇopi adhiṭṭhātabbo iminā parissāvetvā pivissāmīti.