[90] Tena kho pana samayena bhikkhū naggā naggaṃ abhivādenti. Naggā anaggaṃ abhivādenti . naggā naggaṃ abhivādāpenti . naggā anaggaṃ abhivādāpenti . naggā naggassa parikammaṃ karonti . Naggā naggassa parikammaṃ kārāpenti . naggā naggassa denti . Naggā paṭiggaṇhanti . naggā khādanti . naggā bhuñjanti . Naggā sāyanti . naggā pivanti . Bhagavato etamatthaṃ ārocesuṃ .pe. Na bhikkhave naggena naggo abhivādetabbo na naggena abhivādetabbaṃ na naggena naggo abhivādāpetabbo na naggena abhivādāpetabbaṃ na naggena naggassa parikammaṃ kātabbaṃ na naggena [5]- parikammaṃ kārāpetabbaṃ na naggena naggassa dātabbaṃ na naggena paṭiggahetabbaṃ na naggena khāditabbaṃ na naggena bhuñjitabbaṃ Na naggena sāyitabbaṃ na naggena pātabbaṃ yo piveyya āpatti dukkaṭassāti.

[91] Tena kho pana samayena bhikkhū jantāghare chamāyaṃ cīvaraṃ nikkhipanti . cīvaraṃ paṃsukitaṃ hoti . bhagavato etamatthaṃ ārocesuṃ .pe. Anujānāmi bhikkhave jantāghare cīvaravaṃsaṃ cīvararajjunti . deve vassante cīvaraṃ ovassati .pe. anujānāma bhikkhave jantāgharasālanti. Jantāgharasālā nīcavatthukā hoti . udakena otthariyati .pe. Anujānāmi bhikkhave uccavatthukaṃ kātunti . cayo paripatati .pe. Anujānāmi bhikkhave cinituṃ .pe. ārohantā vihaññanti .pe. Ārohantā paripatanti .pe. Anujānāmi bhikkhave ālambanabāhanti.

[92] Tena kho pana samayena jantāgharasālāyaṃ tiṇacuṇṇaṃ paripatati .pe. anujānāmi bhikkhave ogumbetvā ullittāvalittaṃ kātuṃ .pe. Cīvaravaṃsaṃ cīvararajjunti.

[93] Tena kho pana samayena bhikkhū jantāgharepi udakepi piṭṭhiparikammaṃ kātuṃ kukkuccāyanti . bhagavato etamatthaṃ ārocesuṃ . anujānāmi bhikkhave tisso paṭicchādiyo jantāgharapaṭicchādiṃ udakapaṭicchādiṃ vatthapaṭicchādinti.