[159] Tena kho pana samayena chabbaggiyā bhikkhū bahuṃ lohabhaṇḍaṃ kaṃsabhaṇḍaṃ sannicayaṃ karonti . manussā vihāracārikaṃ āhiṇḍantā passitvā ujjhāyanti khīyanti vipācenti kathaṃ hi nāma samaṇā sakyaputtiyā bahuṃ lohabhaṇḍaṃ kaṃsabhaṇḍaṃ sannicayaṃ Karissanti seyyathāpi kaṃsapattharikāti .pe. bhagavato etamatthaṃ ārocesuṃ .pe. na bhikkhave lohabhaṇḍaṃ kaṃsabhaṇḍaṃ sannicayo kātabbo yo kareyya āpatti dukkaṭassāti.

[160] Tena kho pana samayena bhikkhū añjanimpi añjanisalākampi kaṇṇamalaharaṇimpi bandhanamattaṃ kukkuccāyanti . bhagavato etamatthaṃ ārocesuṃ .pe. anujānāmi bhikkhave añjaniṃ añjanisalākaṃ kaṇṇamalaharaṇiṃ bandhanamattanti.

[161] Tena kho pana samayena chabbaggiyā bhikkhū saṅghāṭipallatthikāya nisīdanti . saṅghāṭiyā pattā lujjanti . bhagavato etamatthaṃ ārocesuṃ .pe. na bhikkhave saṅghāṭipallatthikāya nisīditabbaṃ yo nisīdeyya āpatti dukkaṭassāti.

[162] Tena kho pana samayena aññataro bhikkhu gilāno hoti. Tassa vinā āyogā na phāsu hoti .pe. bhagavato etamatthaṃ ārocesuṃ .pe. anujānāmi bhikkhave āyoganti . athakho bhikkhūnaṃ etadahosi kathaṃ nu kho āyogo veditabboti . Bhagavato etamatthaṃ ārocesuṃ .pe. anujānāmi bhikkhave tantakaṃ vemakaṃ vaṭaṃ salākaṃ sabbaṃ tantabhaṇḍakanti.