[198] Tena samayena buddho bhagavā rājagahe viharati veḷuvane kalandakanivāpe . tena kho pana samayena bhagavatā bhikkhūnaṃ senāsanaṃ appaññattaṃ hoti . te ca bhikkhū tahaṃ tahaṃ viharanti araññe rukkhamūle pabbate kandarāyaṃ giriguhāyaṃ susāne vanapatthe ajjhokāse palālapuñje . te kālasseva tato tato upanikkhamanti araññā rukkhamūlā pabbatā kandarā giriguhā susānā vanapatthā ajjhokāsā palālapuñjā pāsādikena abhikkantena paṭikkantena ālokitena vilokitena sammiñjitena pasāritena okkhittacakkhū iriyāpathasampannā.

[199] Tena kho pana samayena rājagahako seṭṭhī kālasseva uyyānaṃ agamāsi . addasā kho rājagahako seṭṭhī te bhikkhū kālasseva tato tato upanikkhamante araññā rukkhamūlā pabbatā kandarā giriguhā susānā vanapatthā ajjhokāsā palālapuñjā pāsādikena abhikkantena paṭikkantena ālokitena vilokitena sammiñjitena pasāritena okkhittacakkhū iriyāpathasampanne . Disvānassa cittaṃ pasīdi . athakho rājagahako seṭṭhī yena te bhikkhū tenupasaṅkami upasaṅkamitvā te bhikkhū etadavoca sacāhaṃ bhante vihāre kāreyyaṃ vaseyyātha me vihāresūti. Na kho gahapati bhagavatā Vihārā anuññātāti . tenahi bhante bhagavantaṃ paṭipucchitvā mama āroceyyāthāti . evaṃ gahapatīti kho te bhikkhū rājagahakassa seṭṭhissa paṭissutvā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te bhikkhū bhagavantaṃ etadavocuṃ rājagahako bhante seṭṭhī vihāre kārāpetukāmo kathaṃ nu kho bhante amhehi paṭipajjitabbanti.

[200] Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave pañca senāsanāni vihāraṃ aḍḍhayogaṃ pāsādaṃ hammiyaṃ guhanti.

[201] Athakho te bhikkhū yena rājagahako seṭṭhī tenupasaṅkamiṃsu upasaṅkamitvā rājagahakaṃ seṭṭhiṃ etadavocuṃ anuññātā kho gahapati bhagavatā vihārā yassidāni kālaṃ maññasīti . Athakho rājagahako seṭṭhī ekāheneva saṭṭhī vihāre patiṭṭhāpesi . Athakho rājagahako seṭṭhī te saṭṭhī vihāre pariyosāpetvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho rājagahako seṭṭhī bhagavantaṃ etadavoca adhivāsetu me bhante bhagavā svātanāya bhattaṃ saddhiṃ bhikkhusaṅghenāti . adhivāsesi bhagavā tuṇhībhāvena . Athakho rājagahako seṭṭhī bhagavato adhivāsanaṃ viditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi . athakho rājagahako seṭṭhī tassā rattiyā accayena paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi kālo bhante niṭṭhitaṃ bhattanti.