[217] Tena kho pana samayena saṅghassa suttaṃ uppannaṃ Hoti . bhagavato etamatthaṃ ārocesuṃ . anujānāmi bhikkhave suttaṃ mañcaṃ veṭhetunti . aṅgāni bahuṃ suttaṃ pariyādiyanti .pe. Anujānāmi bhikkhave aṅge vijjhitvā aṭṭhapadakaṃ veṭhetunti . Coḷakaṃ uppannaṃ hoti . bhagavato etamatthaṃ ārocesuṃ . anujānāmi bhikkhave cimilikaṃ kātunti . tūlikā uppannā hoti .pe. anujānāmi bhikkhave vijaṭetvā bimbohanaṃ kātuṃ tīṇi tūlāni rukkhatūlaṃ latātūlaṃ poṭakītūlanti.

[218] Tena kho pana samayena chabbaggiyā bhikkhū aḍḍhakāyikāni bimbohanāni dhārenti . manussā vihāracārikaṃ āhiṇḍantā passitvā ujjhāyanti khīyanti vipācenti .pe. seyyathāpi gihī kāmabhoginoti .pe. bhagavato etamatthaṃ ārocesuṃ . na bhikkhave aḍḍhakāyikāni bimbohanāni dhāretabbāni yo dhāreyya āpatti dukkaṭassa anujānāmi bhikkhave sīsappamāṇaṃ bimbohanaṃ kātunti.

[219] Tena kho pana samayena rājagahe giraggasamajjo hoti. Manussā mahāmattānaṃ atthāya bhisiyo paṭiyādenti uṇṇabhisiṃ coḷabhisiṃ vākabhisiṃ tiṇabhisiṃ paṇṇabhisiṃ . te vītivatte samajje chaviṃ uppāṭetvā haranti . addasaṃsu kho bhikkhū samajjaṭṭhāne bahuṃ uṇṇampi coḷampi vākampi tiṇampi paṇṇampi chaḍḍitaṃ . Disvāna bhagavato etamatthaṃ ārocesuṃ . anujānāmi bhikkhave pañca bhisiyo uṇṇabhisiṃ coḷabhisiṃ vākabhisiṃ tiṇabhisiṃ paṇṇabhisinti.

[220] Tena kho pana samayena saṅghassa senāsanaparikkhārikaṃ dussaṃ uppannaṃ hoti . bhagavato etamatthaṃ ārocesuṃ . anujānāmi bhikkhave bhisiṃ onaddhitunti .