[260] Athakho bhagavā vesāliyaṃ yathābhirantaṃ viharitvā yena sāvatthī tena cārikaṃ pakkāmi . tena kho pana samayena chabbaggiyānaṃ Bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti seyyāyo pariggaṇhanti idaṃ amhākaṃ upajjhāyānaṃ bhavissati idaṃ amhākaṃ ācariyānaṃ bhavissati idaṃ amhākaṃ bhavissatīti . athakho āyasmā sārīputto buddhappamukhassa saṅghassa piṭṭhito piṭṭhito gantvā vihāresu pariggahitesu seyyāsu pariggahitāsu seyyaṃ alabhamāno aññatarasmiṃ rukkhamūle nisīdi . Athakho bhagavā rattiyā paccūsasamayaṃ paccuṭṭhāya ukkāsi . āyasmāpi sārīputto ukkāsi . ko etthāti . ahaṃ bhagavā sārīputtoti . Kissa tvaṃ sārīputta idha nisinnoti . athakho āyasmā sārīputto bhagavato etamatthaṃ ārocesi.

[261] Athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi saccaṃ kira bhikkhave chabbaggiyānaṃ bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti seyyāyo pariggaṇhanti idaṃ amhākaṃ upajjhāyānaṃ bhavissati idaṃ amhākaṃ ācariyānaṃ bhavissati idaṃ amhākaṃ bhavissatīti . saccaṃ bhagavāti . vigarahi buddho bhagavā kathaṃ hi nāma te bhikkhave moghapurisā buddhappamukhassa saṅghassa purato purato gantvā vihāre pariggahessanti seyyāyo pariggahessanti idaṃ amhākaṃ upajjhāyānaṃ bhavissati idaṃ amhākaṃ ācariyānaṃ bhavissati idaṃ amhākaṃ bhavissatīti netaṃ bhikkhave Appasannānaṃ vā pasādāya .pe. vigarahitvā dhammiṃ kathaṃ katvā bhikkhū āmantesi ko bhikkhave arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā khattiyakulā pabbajito so arahati aggāsanaṃ aggodakaṃ aggapiṇḍanti . Ekacce bhikkhū evamāhaṃsu yo bhagavā brāhmaṇakulā pabbajito so arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā gahapatikulā pabbajito so arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā suttantiko so arahati aggāsanaṃ aggodakaṃ aggapiṇḍanti . Ekacce bhikkhū evamāhaṃsu yo bhagavā vinayadharo .pe. yo bhagavā dhammakathiko so arahati aggāsanaṃ aggodakaṃ aggapiṇḍanti. {261.1} Ekacce bhikkhū evamāhaṃsu yo bhagavā paṭhamassa jhānassa lābhī so arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā dutiyassa jhānassa lābhī so arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā tatiyassa jhānassa lābhī .pe. yo bhagavā catutthassa jhānassa lābhī so arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā sotāpanno so arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā sakidāgāmī .pe. yo bhagavā anāgāmī .pe. yo Bhagavā arahā so arahati aggāsanaṃ aggodakaṃ aggapiṇḍanti . Ekacce bhikkhū evamāhaṃsu yo bhagavā tevijjo so arahati aggāsanaṃ aggodakaṃ aggapiṇḍanti . ekacce bhikkhū evamāhaṃsu yo bhagavā chaḷabhiñño so arahati aggāsanaṃ aggodakaṃ aggapiṇḍanti.