[277] Athakho bhikkhūnaṃ etadahosi kena nu kho senāsanaṃ gāhetabbanti . bhagavato etamatthaṃ ārocesuṃ .pe. anujānāmi bhikkhave pañcahaṅgehi samannāgataṃ bhikkhuṃ senāsanagāhāpakaṃ sammannituṃ yo na chandāgatiṃ gaccheyya na dosāgatiṃ gaccheyya na mohāgatiṃ gaccheyya na bhayāgatiṃ gaccheyya gāhitāgāhitañca jāneyya.

[278] Evañca pana bhikkhave sammannitabbo . paṭhamaṃ bhikkhu yācitabbo . yācitvā byattena bhikkhunā paṭibalena saṅgho ñāpetabbo suṇātu me bhante saṅgho yadi saṅghassa pattakallaṃ saṅgho itthannāmaṃ bhikkhuṃ senāsanagāhāpakaṃ sammanneyya . esā ñatti . suṇātu me bhante saṅgho saṅgho itthannāmaṃ bhikkhuṃ senāsanagāhāpakaṃ sammannati . yassāyasmato khamati itthannāmassa bhikkhuno senāsanagāhāpakassa sammati so tuṇhassa yassa nakkhamati so bhāseyya . sammato saṅghena itthannāmo bhikkhu senāsanagāhāpako khamati saṅghassa tasmā tuṇhī . evametaṃ Dhārayāmīti.

[279] Athakho senāsanagāhāpakānaṃ bhikkhūnaṃ etadahosi kathaṃ nu kho senāsanaṃ gāhāpetabbanti . bhagavato etamatthaṃ ārocesuṃ . anujānāmi bhikkhave paṭhamaṃ bhikkhū gaṇetuṃ bhikkhū gaṇetvā seyyā gaṇetuṃ seyyā gaṇetvā seyyaggena gāhetunti . Seyyaggena gāhentā seyyā ussādiyiṃsu .pe. anujānāmi bhikkhave vihāraggena gāhetunti . vihāraggena gāhentā vihārā ussādiyiṃsu .pe. anujānāmi bhikkhave pariveṇaggena gāhetunti . Pariveṇaggena gāhentā pariveṇā ussādiyiṃsu . anujānāmi bhikkhave anubhāgampi dātuṃ gahite anubhāge añño bhikkhu āgacchati na akāmā dātabboti.

[280] Tena kho pana samayena bhikkhū nissīme ṭhitassa senāsanaṃ gāhenti . bhagavato etamatthaṃ ārocesuṃ .pe. na bhikkhave nissīme ṭhitassa senāsanaṃ gāhetabbaṃ yo gāheyya āpatti dukkaṭassāti.