[349] Athakho devadattassa rahogatassa paṭisallīnassa evañcetaso parivitakko udapādi kaṃ nu kho ahaṃ pasādeyyaṃ yasmiṃ Me pasanne bahu lābhasakkāro uppajjeyyāti . athakho devadattassa etadahosi ayaṃ kho ajātasattu kumāro taruṇo ceva āyatiṃ bhaddo ca yannūnāhaṃ ajātasattuṃ kumāraṃ pasādeyyaṃ tasmiṃ me pasanne bahu lābhasakkāro uppajjissatīti . athakho devadatto senāsanaṃ saṃsāmetvā pattacīvaramādāya yena rājagahaṃ tena pakkāmi anupubbena yena rājagahaṃ tadavasari . athakho devadatto sakavaṇṇaṃ paṭisaṃharitvā kumārakavaṇṇaṃ abhinimmitvā ahimekhalikāya ajātasattussa kumārassa uccaṅke pāturahosi. {349.1} Athakho ajātasattu kumāro bhīto ahosi ubbiggo ussaṅkī utrasto . athakho devadatto ajātasattuṃ kumāraṃ etadavoca bhāyasi maṃ tvaṃ kumārāti . āma bhāyāmi kosi tvanti . ahaṃ devadattoti . sace kho tvaṃ bhante ayyo devadatto iṅgha sakeneva vaṇṇena pātubhavassūti. {349.2} Athakho devadatto kumārakavaṇṇaṃ paṭisaṃharitvā saṅghāṭipattacīvaradharo ajātasattussa kumārassa purato aṭṭhāsi . Athakho ajātasattu kumāro devadattassa iminā iddhipāṭihāriyena abhippasanno pañcahi rathasatehi sāyaṃ pātaṃ upaṭṭhānaṃ gacchati . Pañca ca thālipākasatāni bhattābhihāro abhihariyyati . Athakho devadattassa lābhasakkārasilokena abhibhūtassa pariyādinnacittassa evarūpaṃ icchāgataṃ uppajji ahaṃ bhikkhusaṅghaṃ Pariharissāmīti saha cittuppādā va devadatto tassā iddhiyā parihāyi.

[350] Tena kho samayena kakkudho nāma koḷiyaputto āyasmato mahāmoggallānassa upaṭṭhāko adhunā kālakato aññataraṃ manomayaṃ kāyaṃ upapanno . tassa evarūpo attabhāvapaṭilābho hoti seyyathāpi nāma dve vā tīṇi vā māgadhikāni gāmakkhettāni. So tena attabhāvapaṭilābhena neva attānaṃ na paraṃ byābādheti . Athakho kakkudho devaputto yenāyasmā mahāmoggallāno tenupasaṅkami upasaṅkamitvā āyasmantaṃ mahāmoggalānaṃ abhivādetvā ekamantaṃ aṭṭhāsi . ekamantaṃ ṭhito kho kakkudho devaputto āyasmantaṃ mahāmoggallānaṃ etadavoca devadattassa bhante lābhasakkārasilokena abhibhūtassa pariyādinnacittassa evarūpaṃ icchāgataṃ uppajji ahaṃ bhikkhusaṅghaṃ pariharissāmīti saha cittuppādā va bhante devadatto tassā iddhiyā parihīnoti . idamavoca kakkudho devaputto idaṃ vatvā āyasmantaṃ mahāmoggallānaṃ abhivādetvā padakkhiṇaṃ katvā tattheva antaradhāyi.