[420] Tena kho pana samayena bhikkhū bhattagge na anumodanti. Manussā ujjhāyanti khīyanti vipācenti kathaṃ hi nāma samaṇā sakyaputtiyā bhattagge na anumodissantīti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . athakho te bhikkhū bhagavato etamatthaṃ ārocesuṃ . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave bhattagge anumoditunti.

[421] Athakho bhikkhūnaṃ etadahosi kena nu kho bhattagge anumoditabbanti . bhagavato etamatthaṃ ārocesuṃ . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave therena bhikkhunā bhattagge anumoditunti.

[422] Tena kho pana samayena aññatarassa pūgassa saṅghabhattaṃ Hoti . āyasmā sārīputto saṅghathero hoti . bhikkhū bhagavatā anuññātaṃ therena bhikkhunā bhattagge anumoditunti āyasmantaṃ sārīputtaṃ ekakaṃ ohāya pakkamiṃsu . athakho āyasmā sārīputto te manusse paṭisammoditvā pacchā ekako agamāsi . addasā kho bhagavā āyasmantaṃ sārīputtaṃ dūrato va ekakaṃ āgacchantaṃ disvāna āyasmantaṃ sārīputtaṃ etadavoca kacci sārīputta bhattaṃ iddhaṃ ahosīti . iddhaṃ kho bhante bhattaṃ ahosi apica maṃ bhikkhū ekakaṃ ohāya pakkantāti . athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave bhattagge catūhi pañcahi therānutherehi bhikkhūhi āgametunti.

[423] Tena kho pana samayena aññataro thero bhattagge vaccito āgameti . so vaccaṃ sandhārento mucchito papati. Bhagavato etamatthaṃ ārocesuṃ . anujānāmi bhikkhave sati karaṇīye anantarikaṃ bhikkhuṃ āpucchitvā gantunti.