[432] Tena kho pana samayena chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti. Therā ca bhikkhū uṇhābhitattā dvāraṃ alabhamānā mucchitā papatanti . Ye te bhikkhū appicchā .pe. te ujjhāyanti khīyanti vipācenti Kathaṃ hi nāma chabbaggiyā *- bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdissanti therā ca bhikkhū uṇhābhitattā dvāraṃ alabhamānā mucchitā papatantīti . athakho te bhikkhū bhagavato etamatthaṃ ārocesuṃ .pe. saccaṃ kira bhikkhave chabbaggiyā bhikkhū jantāghare therehi bhikkhūhi nivāriyamānā anādariyaṃ paṭicca pahūtaṃ kaṭṭhaṃ āropetvā aggiṃ datvā dvāraṃ thaketvā dvāre nisīdanti bhikkhū uṇhābhitattā dvāraṃ alabhamānā mucchitā papatantīti . saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi na bhikkhave jantāghare therena bhikkhunā nivāriyamānena anādariyaṃ paṭicca pahūtaṃ kaṭṭhaṃ āropetvā aggi dātabbo yo dadeyya āpatti dukkaṭassa na ca bhikkhave dvāraṃ thaketvā dvāre nisīditabbaṃ yo nisīdeyya āpatti dukkaṭassa tenahi bhikkhave bhikkhūnaṃ jantāgharavattaṃ *- paññāpessāmi yathā bhikkhūhi jantāghare sammā vattitabbaṃ.

[433] Yo paṭhamaṃ jantāgharaṃ gacchati sace chārikā ussannā hoti chārikā chaḍḍetabbā sace jantāgharaṃ uklāpaṃ hoti jantāgharaṃ sammajjitabbaṃ sace paribhaṇḍaṃ uklāpaṃ hoti paribhaṇḍaṃ sammajjitabbaṃ sace pariveṇaṃ uklāpaṃ hoti pariveṇaṃ sammajjitabbaṃ sace koṭṭhako uklāpo hoti koṭṭhako