[341] Athakho bhaddiyo ca sakyarājā anuruddho ca ānando ca bhaggu ca kimilo ca devadatto ca upālikappakena sattamā yathā pure ca caturaṅginiyā senāya uyyānabhūmiṃ niyyanti evameva caturaṅginiyā senāya niyyiṃsu . te dūraṃ gantvā senaṃ nivattāpetvā paravisayaṃ okkamitvā ābharaṇaṃ omuñcitvā uttarāsaṅgena bhaṇḍikaṃ bandhitvā upāliṃ kappakaṃ etadavocuṃ handa bhaṇe upāli nivattassu alante ettakaṃ jīvikāyāti.

[342] Athakho upālissa kappakassa nivattantassa etadahosi Caṇḍā kho sākiyā iminā kumārā nippātitāti ghātāpeyyuṃpi maṃ ime hi nāma sakyakumārā agārasmā anagāriyaṃ pabbajissanti kimaṅgaṃ panāhanti . so bhaṇḍikaṃ muñcitvā taṃ bhaṇḍaṃ rukkhe ālaggetvā yo passati dinnaṃyeva haratūti vatvā yena te sakyakumārā tenupasaṅkami . addasaṃsu kho te sakyakumārā upāliṃ kappakaṃ dūrato va āgacchantaṃ disvāna upāliṃ kappakaṃ etadavocuṃ kissa bhaṇe upāli nivattosīti . idha me ayyaputtā nivattantassa etadahosi caṇḍā kho sākiyā iminā kumārā nippātitāti ghātāpeyyuṃpi maṃ ime hi nāma sakyakumārā agārasmā anagāriyaṃ pabbajissanti kimaṅgaṃ panāhanti so kho ahaṃ ayyaputtā bhaṇḍikaṃ muñcitvā taṃ bhaṇḍaṃ rukkhe ālaggetvā yo passati dinnaṃyeva haratūti vatvā tatomhi paṭinivattoti . suṭṭhu bhaṇe upāli akāsi yaṃ pana nivatto caṇḍā kho sākiyā iminā kumārā nippātitāti ghātāpeyyuṃpi tanti.

[343] Athakho te sakyakumārā upāliṃ kappakaṃ ādāya yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinnā kho te sakyakumārā bhagavantaṃ etadavocuṃ mayaṃ bhante sākiyā nāma mānassino Ayaṃ bhante upāli kappako amhākaṃ dīgharattaṃ paricārako imaṃ bhagavā paṭhamaṃ pabbājetu imassa mayaṃ abhivādanaṃ paccuṭṭhānaṃ añjalikammaṃ sāmīcikammaṃ karissāma evaṃ amhākaṃ sākiyānaṃ sākiyamāno nimmādayissatīti . athakho bhagavā upāliṃ kappakaṃ paṭhamaṃ pabbājesi pacchā te sakyakumāre.