[385] Athakho devadatto sapariso rājagahaṃ pavisitvā pañcahi vatthūhi janaṃ saññāpesi mayaṃ āvuso samaṇaṃ gotamaṃ upasaṅkamitvā pañca vatthūni yācimhā bhagavā bhante anekapariyāyena appicchassa .pe. viriyārambhassa vaṇṇavādī imāni bhante pañca vatthūni anekapariyāyena appicchatāya .pe. viriyārambhāya saṃvattanti sādhu bhante bhikkhū yāvajīvaṃ āraññakā assu yo gāmantaṃ osareyya vajjaṃ naṃ phuseyya .pe. yāvajīvaṃ macchamaṃsaṃ na khādeyyuṃ yo macchamaṃsaṃ khādeyya vajjaṃ naṃ phuseyyāti imāni pañca vatthūni samaṇo gotamo nānujānāti te ca mayaṃ imehi pañcahi Vatthūhi samādāya vattāmāti.
[386] Tattha ye te manussā assaddhā appasannā dubbuddhino te evamāhaṃsu ime kho samaṇā sakyaputtiyā dhūtā sallekhavuttino samaṇo pana gotamo bāhulliko bāhullāya cetetīti . ye pana te manussā saddhā pasannā paṇḍitā buddhimanto te ujjhāyanti khīyanti vipācenti kathaṃ hi nāma devadatto saṅghabhedāya parakkamissati cakkabhedāyāti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma devadatto saṅghabhedāya parakkamissati cakkabhedāyāti. {386.1} Athakho te bhikkhū bhagavato etamatthaṃ ārocesuṃ .pe. Saccaṃ kira tvaṃ devadatta saṅghabhedāya parakkamasi cakkabhedāyāti . saccaṃ bhagavāti . alaṃ devadatta mā te rucci saṅghabhedo garuko kho devadatta saṅghabhedo yo kho devadatta samaggaṃ bhindati kappaṭṭhitikaṃ kibbisaṃ pasavati kappaṃ nirayamhi paccati yo ca kho devadatta bhinnaṃ saṅghaṃ samaggaṃ karoti brahmapuññaṃ pasavati kappaṃ saggamhi modati alaṃ devadatta mā te rucci saṅghabhedo garuko kho devadatta saṅghabhedoti.
[387] Athakho āyasmā ānando pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisi . addasā kho devadatto Āyasmantaṃ ānandaṃ rājagahe piṇḍāya carantaṃ disvāna yenāyasmā ānando tenupasaṅkami upasaṅkamitvā āyasmantaṃ ānandaṃ etadavoca ajjataggedānāhaṃ āvuso ānanda aññatreva bhagavatā aññatreva bhikkhusaṅghā uposathaṃ karissāmi saṅghakammaṃ karissāmīti . Athakho āyasmā ānando rājagahe piṇḍāya caritvā pacchābhattaṃ piṇḍapātapaṭikkanto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi. {387.1} Ekamantaṃ nisinno kho āyasmā ānando bhagavantaṃ etadavoca idhāhaṃ bhante pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisiṃ addasā kho maṃ bhante devadatto rājagahe piṇḍāya carantaṃ disvāna yenāhaṃ tenupasaṅkami upasaṅkamitvā maṃ etadavoca ajjataggedānāhaṃ āvuso ānanda aññatreva bhagavatā aññatreva bhikkhusaṅghā uposathaṃ karissāmi saṅghakammaṃ karissāmīti ajja bhante devadatto saṅghaṃ bhindissatīti . athakho bhagavā etamatthaṃ viditvā tāyaṃ velāyaṃ imaṃ udānaṃ udānesi