[395] Athakho sārīputtamoggallānā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ nisinno kho āyasmā sārīputto bhagavantaṃ etadavoca sādhu bhante bhedakānuvattakā bhikkhū puna upasampajjeyyunti . alaṃ sārīputta mā te rucci bhedakānuvattakānaṃ bhikkhūnaṃ puna upasampadā tenahi tvaṃ sārīputta bhedakānuvattake bhikkhū thullaccayaṃ desāpehi kathaṃ pana te sārīputta devadatto paṭipajjīti . yatheva bhante bhagavā bahudeva rattiṃ bhikkhū dhammiyā kathāya sandassetvā samādapetvā samuttejetvā sampahaṃsetvā maṃ ajjhesi vigatathīnamiddho Kho sārīputta bhikkhusaṅgho paṭibhātu taṃ sārīputta bhikkhūnaṃ dhammī kathā piṭṭhi me āgilāyati tamahaṃ āyamissāmīti evameva kho bhante devadatto paṭipajjīti.

[396] Athakho bhagavā bhikkhū āmantesi bhūtapubbaṃ bhikkhave araññāyatane mahāsarasī taṃ nāgā upanissāya vihariṃsu . te ca taṃ sarasiṃ ogāhetvā soṇḍāya bhiṃsamuḷālaṃ abbūhitvā suvikkhālitaṃ vikkhāletvā akaddamaṃ saṅkhāditvā ajjhoharanti . tesaṃ taṃ vaṇṇāya ceva hoti balāya ca . na ca tatonidānaṃ maraṇaṃ vā nigacchanti maraṇamattaṃ vā dukkhaṃ . tesaṃyeva kho pana bhikkhave mahānāgānaṃ anusikkhamānā taruṇā nāgā bhiṅkacchāpā te taṃ sarasiṃ ogāhetvā soṇḍāya bhiṃsamuḷālaṃ abbūhitvā na suvikkhālitaṃ vikkhāletvā sakaddamaṃ saṅkhāditvā ajjhoharanti . tesaṃ taṃ neva vaṇṇāya hoti na balāya . tatonidānaṃ ca maraṇaṃ vā nigacchanti maraṇamattaṃ vā dukkhaṃ evameva kho bhikkhave devadatto mamānukubbaṃ kapaṇo marissatīti.

[397] Mahāvarāhassa mahiṃ vikubbato bhiṃsaṃ ghasānassa nadīsu jaggato Bhiṅkova paṅkaṃ abhibhakkhayitvā mamānukubbaṃ kapaṇo marissatīti.

[398] Aṭṭhahi bhikkhave aṅgehi samannāgato bhikkhu dūteyyaṃ gantumarahati . katamehi aṭṭhahi . idha bhikkhave bhikkhu sotā ca hoti sāvetā ca uggahetā ca dhāretā ca viññātā ca viññāpetā ca kusalo ca sahitāsahitassa no ca kalahakārako imehi kho bhikkhave aṭṭhahaṅgehi samannāgato bhikkhu dūteyyaṃ gantumarahati.