[42] Tena kho pana samayena bhikkhū miḍhante pattaṃ nikkhipanti. Parivaṭṭitvā patto bhijjati . bhagavato etamatthaṃ ārocesuṃ .pe. na bhikkhave miḍhante patto nikkhipitabbo yo nikkhipeyya āpatti dukkaṭassāti.

[43] Tena kho pana samayena bhikkhū paribhaṇḍante pattaṃ nikkhipanti . parivaṭṭitvā patto bhijjati . bhagavato etamatthaṃ ārocesuṃ .pe. na bhikkhave paribhaṇḍante patto nikkhipitabbo yo nikkhipeyya āpatti dukkaṭassāti.

[44] Tena kho pana samayena bhikkhū chamāyaṃ pattaṃ nikkujjanti. Oṭṭho ghaṃsiyati . bhagavato etamatthaṃ ārocesuṃ .pe. anujānāmi bhikkhave tiṇasanthārakanti . tiṇasanthārako upacikāhi khajjati . Bhagavato etamatthaṃ ārocesuṃ .pe. anujānāmi bhikkhave coḷakanti . Coḷakaṃ upacikāhi khajjati . bhagavato etamatthaṃ ārocesuṃ .pe. Anujānāmi bhikkhave pattamāḷakanti . pattamāḷakā paripatitvā patto bhijjati . bhagavato etamatthaṃ ārocesuṃ .pe. anujānāmi bhikkhave pattakuṇḍolikanti . pattakuṇḍolikāya patto ugghaṃsiyati . Bhagavato etamatthaṃ ārocesuṃ .pe. anujānāmi bhikkhave Pattatthavikanti . aṃsavaddhako na hoti . bhagavato etamatthaṃ ārocesuṃ .pe. Anujānāmi bhikkhave aṃsavaddhakaṃ bandhanasuttakanti.

[45] Tena kho pana samayena bhikkhū bhittikhīlepi nāgadantakepi pattaṃ laggenti . paripatitvā patto bhijjati . bhagavato etamatthaṃ ārocesuṃ .pe. na bhikkhave patto laggetabbo yo laggeyya āpatti dukkaṭassāti.