[437] Yo vaccakuṭiṃ gacchati tena bahiṭṭhitena ukkāsitabbaṃ anto nisinnenapi ukkāsitabbaṃ cīvaravaṃse vā cīvararajjuyā vā cīvaraṃ nikkhipitvā sādhukaṃ ataramānena vaccakuṭī pavisitabbā nātisahasā pavisitabbā na ubbhujitvā pavisitabbā vaccapādukāya ṭhitena ubbhujitabbaṃ na nitthunantena vacco kātabbo na dantakaṭṭhaṃ khādantena vacco kātabbo na bahiddhā vaccadoṇikāya vacco kātabbo na bahiddhā passāvadoṇikāya passāvo kātabbo na passāvadoṇikāya kheḷo kātabbo na pharusena kaṭṭhena avalekhitabbaṃ na avalekhanakaṭṭhaṃ vaccakūpamhi pātetabbaṃ vaccapādukāya ṭhitena paṭicchādetabbaṃ nātisahasā nikkhamitabbaṃ na ubbhujitvā nikkhamitabbaṃ ācamanapādukāya ṭhitena ubbhujitabbaṃ na capucapukārakena ācametabbaṃ na ācamanasarāvake udakaṃ sesetabbaṃ ācamanapādukāya ṭhitena paṭicchādetabbaṃ {437.1} sace vaccakuṭī ūhatā hoti dhovitabbā sace avalekhanapiṭharo pūro hoti avalekhanakaṭṭhaṃ chaḍḍetabbaṃ sace vaccakuṭī uklāpā hoti vaccakuṭī sammajjitabbā sace paribhaṇḍaṃ uklāpaṃ hoti paribhaṇḍaṃ sammajjitabbaṃ sace pariveṇaṃ uklāpaṃ hoti pariveṇaṃ sammajjitabbaṃ sace koṭṭhako uklāpo hoti koṭṭhako sammajjitabbo sace ācamanakumbhiyā udakaṃ na hoti ācamanakumbhiyā udakaṃ Āsiñcitabbaṃ {437.2} idaṃ kho bhikkhave bhikkhūnaṃ vaccakuṭīvattaṃ yathā bhikkhūhi vaccakuṭiyā sammā vattitabbanti.