[449] Athakho bhagavā bhikkhū āmantesi aṭṭhime bhikkhave mahāsamudde acchariyā abbhutā dhammā ye disvā disvā asurā mahāsamudde abhiramanti . katame aṭṭha . mahāsamuddo bhikkhave anupubbaninno anupubbapoṇo anupubbapabbhāro na āyatakeneva papāto yampi bhikkhave mahāsamuddo anupubbaninno anupubbapoṇo anupubba- pabbhāro na āyatakeneva papāto ayaṃ bhikkhave mahāsamudde paṭhamo acchariyo abbhuto dhammo yaṃ disvā disvā asurā mahāsamudde abhiramanti.

[450] Puna caparaṃ bhikkhave mahāsamuddo ṭhitadhammo velaṃ nātivattati yampi bhikkhave mahāsamuddo ṭhitadhammo velaṃ nātivattati ayampi bhikkhave mahāsamudde dutiyo acchariyo abbhuto dhammo yaṃ disvā disvā asurā mahāsamudde abhiramanti.

[451] Puna caparaṃ bhikkhave mahāsamuddo na matena kuṇapena Saṃvasati yaṃ hoti mahāsamudde mataṃ kuṇapaṃ taṃ khippaññeva tīraṃ vāheti thalaṃ ussādeti yampi bhikkhave mahāsamuddo na matena kuṇapena saṃvasati yaṃ hoti mahāsamudde mataṃ kuṇapaṃ taṃ khippaññeva tīraṃ vāheti thalaṃ ussādeti ayampi bhikkhave mahāsamudde tatiyo acchariyo abbhuto dhammo yaṃ disvā disvā asurā mahāsamudde abhiramanti.

[452] Puna caparaṃ bhikkhave yā kāci mahānadiyo seyyathīdaṃ gaṅgā yamunā aciravatī sarabhū mahī tā mahāsamuddaṃ pattā jahanti purimāni nāmagottāni mahāsamuddotveva saṅkhyaṃ gacchanti yampi bhikkhave yā kāci mahānadiyo seyyathīyaṃ gaṅgā yamunā aciravatī sarabhū mahī tā mahāsamuddaṃ pattā jahanti purimāni nāmagottāni mahāsamuddotveva saṅkhyaṃ gacchanti ayampi bhikkhave mahāsamudde catuttho acchariyo abbhuto dhammo yaṃ disvā disvā asurā mahāsamudde abhiramanti.