[50] Tena kho pana samayena bhikkhū pattahatthā kavāṭaṃ paṇāmenti . kavāṭe āvaṭṭitvā patto bhijjati . bhagavato etamatthaṃ ārocesuṃ .pe. na bhikkhave pattahatthena bhikkhunā kavāṭaṃ paṇāmetabbaṃ yo paṇāmeyya āpatti dukkaṭassāti.

[51] Tena kho pana samayena bhikkhū tumbakaṭāhena piṇḍāya caranti . manussā ujjhāyanti khīyanti vipācenti .pe. seyyathāpi titthiyāti. Bhagavato etamatthaṃ ārocesuṃ .pe. Na bhikkhave tumbakaṭāhena piṇḍāya caritabbaṃ yo careyya āpatti dukkaṭassāti.

[52] Tena kho pana samayena bhikkhū ghaṭikaṭāhena piṇḍāya caranti. Manussā ujjhāyanti khīyanti vipācenti .pe. seyyathāpi titthiyāti . Bhagavato etamatthaṃ ārocesuṃ .pe. na bhikkhave ghaṭikaṭāhena piṇḍāya caritabbaṃ yo careyya āpatti dukkaṭassāti.

[53] Tena kho pana samayena aññataro bhikkhu sabbapaṃsukūliko hoti . so chavasīsassa pattaṃ dhāreti . aññatarā itthī Passitvā bhītā vissaramakāsi abbhumme pisāco vatāyanti . Manussā ujjhāyanti khīyanti vipācenti kathaṃ hi nāma samaṇā sakyaputtiyā chavasīsassa pattaṃ dhāressanti seyyathāpi pisācillikāti . Bhagavato etamatthaṃ ārocesuṃ .pe. na bhikkhave chavasīsassa patto dhāretabbo yo dhāreyya āpatti dukkaṭassa na ca bhikkhave sabbapaṃsukūlikena bhavitabbaṃ yo bhaveyya āpatti dukkaṭassāti.