[472] Katamāni dve dhammikāni pātimokkhaṭṭhapanāni . Samūlikāya sīlavipattiyā pātimokkhaṃ ṭhapeti samūlikāya ācāravipattiyā pātimokkhaṃ ṭhapeti imāni dve dhammikāni pātimokkhaṭṭhapanāni.

[473] Katamāni tīṇi adhammikāni pātimokkhaṭṭhapanāni . Amūlikāya sīlavipattiyā pātimokkhaṃ ṭhapeti amūlikāya ācāravipattiyā pātimokkhaṃ ṭhapeti amūlikāya diṭṭhivipattiyā pātimokkhaṃ ṭhapeti imāni tīṇi adhammikāni pātimokkhaṭṭhapanāni.

[474] Katamāni tīṇi dhammikāni pātimokkhaṭṭhapanāni . Samūlikāya sīlavipattiyā pātimokkhaṃ ṭhapeti samūlikāya ācāravipattiyā pātimokkhaṃ ṭhapeti samūlikāya diṭṭhivipattiyā pātimokkhaṃ ṭhapeti imāni tīṇi dhammikāni pātimokkhaṭṭhapanāni.

[475] Katamāni cattāri adhammikāni pātimokkhaṭṭhapanāni . Amūlikāya sīlavipattiyā pātimokkhaṃ ṭhapeti amūlikāya ācāravipattiyā pātimokkhaṃ ṭhapeti amūlikāya diṭṭhivipattiyā pātimokkhaṃ ṭhapeti amūlikāya ājīvavipattiyā pātimokkhaṃ ṭhapeti imāni cattāri adhammikāni pātimokkhaṭṭhapanāni.