[488] Katamāni dasa dhammikāni pātimokkhaṭṭhapanāni . Pārājiko tassaṃ parisāyaṃ nisinno hoti pārājikakathā vippakatā hoti sikkhaṃ paccakkhātako tassaṃ parisāyaṃ nisinno hoti sikkhaṃ paccakkhātakathā vippakatā hoti dhammikaṃ sāmaggiṃ na upeti dhammikaṃ Sāmaggiṃ paccādiyati dhammikāya sāmaggiyā paccādānakathā vippakatā hoti sīlavipattiyā diṭṭhasutaparisaṅkito hoti ācāravipattiyā diṭṭhasutaparisaṅkito hoti diṭṭhivipattiyā diṭṭhasutaparisaṅkito hoti imāni dasa dhammikāni pātimokkhaṭṭhapanāni .

[489] Kathaṃ pārājiko tassaṃ parisāyaṃ nisinno hoti . idha bhikkhave yehi ākārehi yehi liṅgehi yehi nimittehi pārājikassa dhammassa ajjhāpatti hoti tehi ākārehi tehi liṅgehi tehi nimittehi bhikkhu bhikkhuṃ passati pārājikaṃ dhammaṃ ajjhāpajjantaṃ na heva kho bhikkhu bhikkhuṃ passati pārājikaṃ dhammaṃ ajjhāpajjantaṃ apica añño bhikkhu bhikkhussa āroceti itthannāmo āvuso bhikkhu pārājikaṃ dhammaṃ ajjhāpannoti na heva kho bhikkhu bhikkhuṃ passati pārājikaṃ dhammaṃ ajjhāpajjantaṃ na pi añño bhikkhu bhikkhussa āroceti itthannāmo āvuso bhikkhu pārājikaṃ dhammaṃ ajjhāpannoti apica so va bhikkhu bhikkhussa āroceti ahaṃ āvuso pārājikaṃ dhammaṃ ajjhāpannoti ākaṅkhamāno bhikkhave bhikkhu tena diṭṭhena tena sutena tāya parisaṅkāya tadahuposathe cātuddase vā paṇṇarase vā tasmiṃ puggale sammukhībhūte saṅghamajjhe udāhareyya {489.1} suṇātu me bhante saṅgho itthannāmo puggalo pārājikaṃ dhammaṃ ajjhāpanno tassa pātimokkhaṃ ṭhapemi na tasmiṃ Sammukhībhūte pātimokkhaṃ uddisitabbanti. Dhammikaṃ pātimokkhaṭṭhapanaṃ.

[490] Bhikkhussa pātimokkhe ṭhapite parisā vuṭṭhāti dasannaṃ antarāyānaṃ aññatarena antarāyena rājantarāyena vā corantarāyena vā agyantarāyena vā udakantarāyena vā manussantarāyena vā amanussantarāyena vā vāḷantarāyena vā siriṃsapantarāyena vā jīvitantarāyena vā brahmacariyantarāyena vā ākaṅkhamāno bhikkhave bhikkhu tasmiṃ āvāse aññatarasmiṃ vā āvāse tasmiṃ puggale sammukhībhūte saṅghamajjhe udāhareyya {490.1} suṇātu me bhante saṅgho itthannāmassa puggalassa pārājikakathā vippakatā taṃ vatthuṃ avinicchitaṃ yadi saṅghassa pattakallaṃ saṅgho taṃ vatthuṃ vinicchineyyāti . evañce taṃ labhetha iccetaṃ kusalaṃ no ce labhetha tadahuposathe cātuddase vā paṇṇarase vā tasmiṃ puggale sammukhībhūte saṅghamajjhe udāharitabbaṃ {490.2} suṇātu me bhante saṅgho itthannāmassa puggalassa pārājikakathā vippakatā taṃ vatthuṃ avinicchitaṃ tassa pātimokkhaṃ ṭhapemi na tasmiṃ sammukhībhūte pātimokkhaṃ uddisitabbanti . dhammikaṃ pātimokkhaṭṭhapanaṃ.