[504] Puna caparaṃ upāli codakena bhikkhunā paraṃ codetukāmena evaṃ paccavekkhitabbaṃ ubhayāni nu kho me pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso saṃvijjati nu kho me eso dhammo udāhu noti . No ce upāli bhikkhuno ubhayāni pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso idaṃ panāvuso kattha vuttaṃ bhagavatāti iti puṭṭho na sampādeti tassa bhavanti vattāro iṅgha tāva āyasmā vinayaṃ pariyāpuṇassūti itissa bhavanti vattāro codakenupāli bhikkhunā paraṃ codetukāmena ime pañca dhamme ajjhattaṃ paccavekkhitvā paro codetabboti.

[505] Codakena bhante bhikkhunā paraṃ codetukāmena katī dhamme ajjhattaṃ upaṭṭhāpetvā paro codetabboti . codakenupāli bhikkhunā paraṃ codetukāmena pañca dhamme ajjhattaṃ upaṭṭhāpetvā paro codetabbo kālena vakkhāmi no akālena bhūtena vakkhāmi No abhūtena saṇhena vakkhāmi no pharusena atthasañhitena vakkhāmi no anatthasañhitena mettacitto vakkhāmi no dosantaroti codakenupāli bhikkhunā paraṃ codetukāmena ime pañca dhamme ajjhattaṃ upaṭṭhāpetvā paro codetabboti.