[506] Adhammacodakassa bhante bhikkhuno katīhākārehi vippaṭisāro upadahātabboti . adhammacodakassa upāli bhikkhuno pañcahākārehi vippaṭisāro upadahātabbo akālenāyasmā codesi no kālena alante vippaṭisārāya abhūtenāyasmā codesi no bhūtena alante vippaṭisārāya pharusenāyasmā codesi no saṇhena alante vippaṭisārāya anatthasañhitenāyasmā codesi no atthasañhitena alante vippaṭisārāya dosantaro āyasmā codesi no mettacitto alante vippaṭisārāyāti adhammacodakassa upāli bhikkhuno imehi pañcahākārehi vippaṭisāro upadahātabbo . taṃ kissa hetu . yathā na aññopi bhikkhu abhūtena codetabbaṃ maññeyyāti.

[507] Adhammacuditassa pana bhante bhikkhuno katīhākārehi avippaṭisāro upadahātabboti . adhammacuditassa upāli bhikkhuno pañcahākārehi avippaṭisāro upadahātabbo akālenāyasmā cudito no kālena alante avippaṭisārāya abhūtenāyasmā cudito no bhūtena alante avippaṭisārāya pharusenāyasmā Cudito no saṇhena alante avippaṭisārāya anatthasañhitenāyasmā cudito no atthasañhitena alante avippaṭisārāya dosantarenāyasmā cudito no mettacittena alante avippaṭisārāyāti adhammacuditassa upāli bhikkhuno imehi pañcahākārehi avippaṭisāro upadahātabboti.

[508] Dhammacodakassa bhante bhikkhuno katīhākārehi avippaṭisāro upadahātabboti . dhammacodakassa upāli bhikkhuno pañcahākārehi avippaṭisāro upadahātabbo kālenāyasmā codesi no akālena alante avippaṭisārāya bhūtenāyasmā codesi no abhūtena alante avippaṭisārāya saṇhenāyasmā codesi no pharusena alante avippaṭisārāya atthasañhitenāyasmā codesi no anatthasañhitena alante avippaṭisārāya mettacitto āyasmā codesi no dosantaro alante avippaṭisārāyāti dhammacodakassa upāli bhikkhuno imehi pañcahākārehi avippaṭisāro upadahātabbo . taṃ kissa hetu . Yathā aññopi bhikkhu bhūtena codetabbaṃ maññeyyāti.

[509] Dhammacuditassa pana bhante bhikkhuno katīhākārehi vippaṭisāro upadahātabboti . dhammacuditassa upāli bhikkhuno pañcahākārehi vippaṭisāro upadahātabbo kālenāyasmā cudito no akālena alante vippaṭisārāya bhūtenāyasmā cudito no Abhūtena alante vippaṭisārāya saṇhenāyasmā cudito no pharusena alante vippaṭisārāya atthasañhitenāyasmā cudito no anatthasañhitena alante vippaṭisārāya mettacittenāyasmā cudito no dosantarena alante vippaṭisārāyāti dhammacuditassa upāli bhikkhuno imehi pañcahākārehi vippaṭisāro upadahātabboti.