[55] Tena kho pana samayena bhikkhū hatthena cīvaraṃ viphāletvā cīvaraṃ sibbenti . cīvaraṃ vilomaṃ hoti . bhagavato etamatthaṃ ārocesuṃ .pe. Anujānāmi bhikkhave satthakaṃ namatakanti.

[56] Tena kho pana samayena saṅghassa daṇḍasatthakaṃ uppannaṃ hoti . bhagavato etamatthaṃ ārocesuṃ . anujānāmi bhikkhave Daṇḍasatthakanti.

[57] Tena kho pana samayena chabbaggiyā bhikkhū uccāvace satthakadaṇḍe dhārenti sovaṇṇamayaṃ rūpiyamayaṃ . manussā ujjhāyanti khīyanti vipācenti .pe. seyyathāpi gihī kāmabhoginoti .pe. Bhagavato etamatthaṃ ārocesuṃ .pe. na bhikkhave uccāvacā satthakadaṇḍā dhāretabbā yo dhāreyya āpatti dukkaṭassa anujānāmi bhikkhave aṭṭhimayaṃ dantamayaṃ visāṇamayaṃ naḷamayaṃ veḷumayaṃ kaṭṭhamayaṃ jatumayaṃ phalamayaṃ lohamayaṃ saṅkhanābhimayanti.

[58] Tena kho pana samayena bhikkhū kukkuṭapattenapi veḷupesikāyapi cīvaraṃ sibbanti . cīvaraṃ dussibbitaṃ hoti . bhagavato etamatthaṃ ārocesuṃ .pe. anujānāmi bhikkhave sūcinti . sūciyo kaṇṇakitāyo honti .pe. anujānāmi bhikkhave sūcināḷikanti . Nāḷikāyapi kaṇṇakitāyo honti .pe. anujānāmi bhikkhave kiṇṇena pūretunti . kiṇṇepi kaṇṇakitāyo honti .pe. Anujānāmi bhikkhave sattuyā pūretunti . sattuyāpi kaṇṇakitāyo honti .pe. anujānāmi bhikkhave saritakanti . saritakepi kaṇṇakitāyo honti .pe. anujānāmi bhikkhave madhusitthakena sāretunti . Saritakampi paribhijjati. Anujānāmi bhikkhave saritasipāṭikanti .