[532] Tena kho pana samayena uppalavaṇṇāya bhikkhuniyā antevāsinī bhikkhunī satta vassāni bhagavantaṃ anubandhā hoti vinayaṃ pariyāpuṇantī . tassā muṭṭhassatiniyā gahito gahito mussati . assosi kho sā bhikkhunī bhagavā kira sāvatthiṃ gantukāmoti. Athakho tassā bhikkhuniyā etadahosi ahaṃ kho satta vassāni bhagavantaṃ anubandhiṃ vinayaṃ pariyāpuṇantī tassā me muṭṭhassatiniyā gahito gahito mussati dukkaraṃ kho pana mātugāmena yāvajīvaṃ Satthāraṃ anubandhituṃ kathaṃ nu kho mayā paṭipajjitabbanti . athakho sā bhikkhunī bhikkhunīnaṃ etamatthaṃ ārocesi . bhikkhuniyo bhikkhūnaṃ etamatthaṃ ārocesuṃ . te bhikkhū bhagavato etamatthaṃ ārocesuṃ .pe. Anujānāmi bhikkhave bhikkhūhi bhikkhunīnaṃ vinayaṃ vācetunti. Paṭhamabhāṇavāraṃ.

[533] Athakho bhagavā vesāliyaṃ yathābhirantaṃ viharitvā yena sāvatthī tena cārikaṃ pakkāmi anupubbena cārikaṃ caramāno yena sāvatthī tadavasari . tatra sudaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū bhikkhuniyo kaddamodakena osiñcanti appevanāma amhesu sārajjeyyunti .pe. bhagavato etamatthaṃ ārocesuṃ .pe. na bhikkhave bhikkhunā bhikkhuniyo kaddamodakena osiñcitabbā yo osiñceyya āpatti dukkaṭassa anujānāmi bhikkhave tassa bhikkhuno daṇḍakammaṃ kātunti . athakho bhikkhūnaṃ etadahosi kinnu kho daṇḍakammaṃ kātabbanti . te bhikkhū bhagavato etamatthaṃ ārocesuṃ. Avandiyo so bhikkhave bhikkhu bhikkhunīsaṅghena kātabboti.