[534] Tena kho pana samayena chabbaggiyā bhikkhū kāyaṃ vivaritvā bhikkhunīnaṃ dassenti ūruṃ vivaritvā bhikkhunīnaṃ dassenti aṅgajātaṃ vivaritvā bhikkhunīnaṃ dassenti bhikkhuniyo obhāsenti bhikkhunīhi saddhiṃ sampayojenti appevanāma amhesu sārajjeyyunti .pe. Bhagavato etamatthaṃ ārocesuṃ .pe. na bhikkhave bhikkhunā kāyo vivaritvā bhikkhunīnaṃ dassetabbo na ūru vivaritvā bhikkhunīnaṃ dassetabbā na aṅgajātaṃ vivaritvā bhikkhunīnaṃ dassetabbaṃ na bhikkhuniyo obhāsitabbā na bhikkhunīhi saddhiṃ sampayojetabbaṃ yo sampayojeyya āpatti dukkaṭassa anujānāmi bhikkhave tassa bhikkhuno daṇḍakammaṃ kātunti . athakho bhikkhūnaṃ etadahosi kinnu kho daṇḍakammaṃ kātabbanti . te bhikkhū bhagavato etamatthaṃ ārocesuṃ. Avandiyo so bhikkhave bhikkhu bhikkhunīsaṅghena kātabboti.

[535] Tena kho pana samayena chabbaggiyā bhikkhuniyo bhikkhū kaddamodakena osiñcanti appevanāma amhesu sārajjeyyunti . Te bhikkhū bhagavato etamatthaṃ ārocesuṃ .pe. na bhikkhave bhikkhuniyā bhikkhū kaddamodakena osiñcitabbā yā osiñceyya āpatti dukkaṭassa anujānāmi bhikkhave tassā bhikkhuniyā daṇḍakammaṃ kātunti . athakho bhikkhūnaṃ etadahosi kinnu kho daṇḍakammaṃ kātabbanti . te bhikkhū bhagavato etamatthaṃ ārocesuṃ . anujānāmi bhikkhave āvaraṇaṃ kātunti . āvaraṇe kate na ādiyanti . te bhikkhū bhagavato etamatthaṃ ārocesuṃ . anujānāmi bhikkhave ovādaṃ ṭhapetunti.

[536] Tena kho pana samayena chabbaggiyā bhikkhuniyo kāyaṃ vivaritvā bhikkhūnaṃ dassenti thanaṃ vivaritvā bhikkhūnaṃ dassenti ūruṃ Vivaritvā bhikkhūnaṃ dassenti aṅgajātaṃ vivaritvā bhikkhūnaṃ dassenti bhikkhū obhāsenti bhikkhūhi saddhiṃ sampayojenti appevanāma amhesu sārajjeyyunti .pe. te bhikkhū bhagavato etamatthaṃ ārocesuṃ .pe. na bhikkhave bhikkhuniyā kāyo vivaritvā bhikkhūnaṃ dassetabbo na thanaṃ vivaritvā bhikkhūnaṃ dassetabbaṃ na ūru vivaritvā bhikkhūnaṃ dassetabbā na aṅgajātaṃ vivaritvā bhikkhūnaṃ dassetabbaṃ na bhikkhū obhāsitabbā na bhikkhūhi saddhiṃ sampayojetabbaṃ yā sampayojeyya āpatti dukkaṭassa anujānāmi bhikkhave tassā bhikkhuniyā daṇḍakammaṃ kātunti . athakho bhikkhūnaṃ etadahosi kinnu kho daṇḍakammaṃ kātabbanti . bhagavato etamatthaṃ ārocesuṃ .pe. anujānāmi bhikkhave āvaraṇaṃ kātunti . Āvaraṇe kate na ādiyanti .pe. bhagavato etamatthaṃ ārocesuṃ .pe. Anujānāmi bhikkhave ovādaṃ ṭhapetunti.