[3] Tena kho pana samayena chabbaggiyā bhikkhū nahāyamānā kuḍḍe kāyaṃ ugghaṃsenti ūrumpi bāhumpi urampi piṭṭhimpi . Manussā ujjhāyanti khīyanti vipācenti kathaṃ hi nāma samaṇā Sakyaputtiyā nahāyamānā kuḍḍe kāyaṃ ugghaṃsessanti ūrumpi bāhumpi urampi piṭṭhimpi seyyathāpi mallamuṭṭhikā gāmapūṭavāti .pe. na bhikkhave nahāyamānena kuḍḍe kāyo ugghaṃsetabbo yo ugghaṃseyya āpatti dukkaṭassāti.

[4] Tena kho pana samayena chabbaggiyā bhikkhū nahāyamānā aṭṭhāne nahāyanti . manussā ujjhāyanti khīyanti vipācenti .pe. seyyathāpi gihī kāmabhoginoti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ .pe. athakho te bhikkhū bhagavato etamatthaṃ ārocesuṃ .pe. saccaṃ kira bhikkhave .pe. saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi na bhikkhave nahāyamānena aṭṭhāne nahāyitabbaṃ yo nahāyeyya āpatti dukkaṭassāti.

[5] Tena kho pana samayena chabbaggiyā bhikkhū gandhabbahatthakena nahāyanti . manussā ujjhāyanti khīyanti vipācenti .pe. Seyyathāpi gihī kāmabhoginoti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ .pe. athakho te bhikkhū bhagavato etamatthaṃ ārocesuṃ .pe. na bhikkhave gandhabbahatthakena nahāyitabbaṃ yo nahāyeyya āpatti dukkaṭassāti.

[6] Tena kho pana samayena chabbaggiyā bhikkhū kuruvindakasuttiyā nahāyanti . manussā ujjhāyanti khīyanti vipācenti .pe. Seyyathāpi gihī kāmabhoginoti .pe. bhagavato etamatthaṃ ārocesuṃ .pe. na bhikkhave kuruvindakasuttiyā nahāyitabbaṃ yo nahāyeyya āpatti dukkaṭassāti.