[545] Tena kho pana samayena bhikkhū ovādaṃ na gaṇhanti .pe. Bhagavato etamatthaṃ ārocesuṃ .pe. na bhikkhave ovādo na gahetabbo yo na gaṇheyya āpatti dukkaṭassāti.

[546] Tena kho pana samayena aññataro bhikkhu bālo hoti . taṃ bhikkhuniyo upasaṅkamitvā etadavocuṃ ovādaṃ ayya gaṇhāhīti . ahamhi bhaginī bālo kathāhaṃ ovādaṃ gaṇhāmīti . Gaṇhāhayya ovādaṃ evaṃ hi bhagavatā paññattaṃ bhikkhūhi bhikkhunīnaṃ ovādo gahetabboti . bhagavato etamatthaṃ ārocesuṃ . Anujānāmi bhikkhave ṭhapetvā bālaṃ avasesehi ovādaṃ gahetunti.

[547] Tena kho pana samayena aññataro bhikkhu gilāno hoti . taṃ bhikkhuniyo upasaṅkamitvā etadavocuṃ ovādaṃ ayya gaṇhāhīti . ahamhi bhaginī gilāno kathāhaṃ ovādaṃ gaṇhāmīti . Gaṇhāhayya ovādaṃ evaṃ hi bhagavatā paññattaṃ ṭhapetvā bālaṃ avasesehi ovādo gahetabboti . bhagavato etamatthaṃ ārocesuṃ . anujānāmi bhikkhave ṭhapetvā bālaṃ ṭhapetvā gilānaṃ avasesehi ovādaṃ gahetunti.

[548] Tena kho pana samayena aññataro bhikkhu gamiko hoti . taṃ bhikkhuniyo upasaṅkamitvā etadavocuṃ ovādaṃ ayya gaṇhāhīti . ahamhi bhaginī gamiko kathāhaṃ ovādaṃ gaṇhāmīti . Gaṇhāhayya ovādaṃ evaṃ hi bhagavatā paññattaṃ ṭhapetvā bālaṃ ṭhapetvā gilānaṃ avasesehi ovādo gahetabboti . bhagavato etamatthaṃ ārocesuṃ .pe. anujānāmi bhikkhave ṭhapetvā bālaṃ ṭhapetvā gilānaṃ ṭhapetvā gamikaṃ avasesehi ovādaṃ gahetunti.