[549] Tena kho pana samayena aññataro bhikkhu araññe viharati . taṃ bhikkhuniyo upasaṅkamitvā etadavocuṃ ovādaṃ ayya gaṇhāhīti . ahaṃ hi bhaginī araññe viharāmi kathāhaṃ Ovādaṃ gaṇhāmīti . gaṇhāhayya ovādaṃ evaṃ hi bhagavatā paññattaṃ ṭhapetvā bālaṃ ṭhapetvā gilānaṃ ṭhapetvā gamikaṃ avasesehi ovādo gahetabboti . bhagavato etamatthaṃ ārocesuṃ . Anujānāmi bhikkhave āraññakena bhikkhunā ovādaṃ gahetuṃ saṅketañca kātuṃ atra paṭiharissāmīti.

[550] Tena kho pana samayena bhikkhū ovādaṃ gahetvā na ārocenti. Bhagavato etamatthaṃ ārocesuṃ .pe. Na bhikkhave ovādo na ārocetabbo yo na āroceyya āpatti dukkaṭassāti.

[551] Tena kho pana samayena bhikkhū ovādaṃ gahetvā na paccāharanti .pe. Bhagavato etamatthaṃ ārocesuṃ. Na bhikkhave ovādo na paccāharitabbo yo na paccāhareyya āpatti dukkaṭassāti.

[552] Tena kho pana samayena bhikkhuniyo saṅketaṃ na gacchanti. Bhagavato etamatthaṃ ārocesuṃ . na bhikkhave bhikkhuniyā saṅketaṃ na gantabbaṃ yā na gaccheyya āpatti dukkaṭassāti.