[559] Tena kho pana samayena aññatarā bhikkhunī kālaṃ karontī evamāha mamaccayena mayhaṃ parikkhāro saṅghassa hotūti . Tattha bhikkhū ca bhikkhuniyo ca vivadanti amhākaṃ hoti amhākaṃ hotīti . bhagavato etamatthaṃ ārocesuṃ .pe. bhikkhunī ce Bhikkhave kālaṃ karontī evaṃ vadeyya mamaccayena mayhaṃ parikkhāro saṅghassa hotūti anissaro tattha bhikkhusaṅgho bhikkhunīsaṅghassevetaṃ . Sikkhamānā ce bhikkhave .pe. sāmaṇerī ce bhikkhave kālaṃ karontī evaṃ vadeyya mamaccayena mayhaṃ parikkhāro saṅghassa hotūti anissaro tattha bhikkhusaṅgho bhikkhunīsaṅghassevetaṃ . Bhikkhu ce bhikkhave kālaṃ karonto evaṃ vadeyya mamaccayena mayhaṃ parikkhāro saṅghassa hotūti anissaro tattha bhikkhunīsaṅgho bhikkhusaṅghassevetaṃ . sāmaṇero ce bhikkhave .pe. upāsako ce bhikkhave .pe. upāsikā ce bhikkhave .pe. añño ce bhikkhave koci kālaṃ karonto evaṃ vadeyya mamaccayena mayhaṃ parikkhāro saṅghassa hotūti anissaro tattha bhikkhunīsaṅgho bhikkhusaṅghassevetanti.

[560] Tena kho pana samayena aññatarā itthī purāṇamallī bhikkhunīsu pabbajitā hoti . sā rathikāya dubbalakaṃ bhikkhuṃ passitvā aṃsakūṭena pahāraṃ datvā pavaṭṭesi . bhikkhū ujjhāyanti khīyanti vipācenti kathaṃ hi nāma bhikkhunī bhikkhussa pahāraṃ dassatīti . Bhagavato etamatthaṃ ārocesuṃ . na bhikkhave bhikkhuniyā bhikkhussa pahāro dātabbo yā dadeyya āpatti dukkaṭassa anujānāmi bhikkhave Bhikkhuniyā bhikkhuṃ passitvā dūrato va okkamitvā maggaṃ dātunti.

[561] Tena kho pana samayena aññatarā itthī pavutthapatikā jārena gabbhinī hoti . sā gabbhaṃ pātetvā kulupakiṃ bhikkhuniṃ etadavoca handayye imaṃ gabbhaṃ pattena nīharāti . athakho sā bhikkhunī taṃ gabbhaṃ patte pakkhipitvā saṅghāṭiyā paṭicchādetvā agamāsi . tena kho pana samayena aññatarena piṇḍacārikena bhikkhunā samādānaṃ kataṃ hoti yaṃ yvāhaṃ paṭhamaṃ bhikkhaṃ labhissāmi na taṃ adatvā bhikkhussa vā bhikkhuniyā vā paribhuñjissāmīti. {561.1} Athakho so bhikkhu taṃ bhikkhuniṃ passitvā etadavoca handa bhagini bhikkhaṃ paṭiggaṇhāti . alaṃ ayyāti . dutiyampi kho so bhikkhu taṃ bhikkhuniṃ etadavoca handa bhagini bhikkhaṃ paṭiggaṇhāti . Alaṃ ayyāti . tatiyampi kho so bhikkhu taṃ bhikkhuniṃ etadavoca handa bhagini bhikkhaṃ paṭiggaṇhāti . alaṃ ayyāti . mayā kho bhagini samādānaṃ kataṃ yaṃ yvāhaṃ paṭhamaṃ bhikkhaṃ labhissāmi na taṃ adatvā bhikkhussa vā bhikkhuniyā vā paribhuñjissāmīti handa bhagini bhikkhaṃ paṭiggaṇhāti. {561.2} Athakho sā bhikkhunī tena bhikkhunā nippīḷiyamānā nīharitvā pattaṃ dassesi passa ayya patte gabbhaṃ mā kassaci ārocesīti . athakho so bhikkhu ujjhāyati khīyati vipāceti kathaṃ Hi nāma bhikkhunī pattena gabbhaṃ nīharissatīti . athakho so bhikkhu bhikkhūnaṃ etamatthaṃ ārocesi . ye te bhikkhū appicchā .pe. Te ujjhāyanti khīyanti vipācenti kathaṃ hi nāma bhikkhunī pattena gabbhaṃ nīharissatīti . bhagavato etamatthaṃ ārocesuṃ .pe. na bhikkhave bhikkhuniyā pattena gabbho nīharitabbo yā nīhareyya āpatti dukkaṭassa anujānāmi bhikkhave bhikkhuniyā bhikkhuṃ passitvā nīharitvā pattaṃ dassetunti.